ننګرهار پوهنتون کې د شهید استاد پوهنمل ادم خان ملاتړ د فاتحې مراسم ترسره شول
د ننګرهار پوهنتون د ژبو او ادبیاتو پوهنځي د پښتو څانګې استاد شهید پوهنمل ادم خان ملاتړ د فاتحې مراسم ددې پوهنتون د ادارې، استادانو او د ارواښاد د کورنۍ له خوا د پوهنتون د فاميليو په مسجد کې ترسره شول.
په يادو مراسمو کې د ننګرهار پوهنتون د رئیس، مرستیالانو، د بېلابېلو پوهنځیو رئیسانو، استادانو، محصلینو او اداري کارکوونکو سربېره د ارواښاد استاد دوستانو او خپلوانو برخه واخیسته.
د ننګرهار پوهنتون رئيس پوهاند دوکتور خليل احمد بهسودوال د ارواښاد ملاتړ شهادت لویه غمیزه او د ننګرهار پوهنتون لپاره نه جبرانېدونکې ضایعه وبلله.
نوموړي د پوهنمل ملاتړ په علمي ژوند او خدمتونو رڼا واچوله او زیاته یې کړه، چې شهید ملاتړ څه دپاسه یوه لسیزه د هېوادوالو په خدمت او د پښتو ادب په برخه کې د هېواد د علمي کادرونو په روزنه کې تېره کړه.
د ژبو او ادبیاتو پوهنځي استاد پوهنمل عطاءالله هدایت بل ویناوال ؤ، چې د شهید ملاتړ د شخصیت، علمیت او ترسره کړیو خدمتونو په اړه یې وینا وکړه او د پوهنتون له مشرتابه، استادانو، منسوبینو او د فاتحې له ټولو ګډونوالو یې مننه وکړه، چې د ارواښاد استاد په وير راټول شول او نوموړي ته يې د دعا لاسونه لپه کړل.
ارواښاد استاد پوهنمل ادم خان ملاتړ د تېرې پنجشنبې په سهار د خوږیاڼو په حکیم اباد سیمه کې هغه مهال د ناڅرګنده کسانو له لوري په شهادت ورسول شو، چې دندې ته د راتګ په حال کې وو.
