ننګرهار پوهنتون کې د تضمین کیفیت او اعتبار ورکولو پروسې د چوکاټ، علمي پروګرامونو او د نویو بیاکتونکو لپاره روزنیز ورکشاپ جوړ شو.
په نوموړي څلور ورځني ورکشاپ کې، چې د لوړو زده کړو وزارت د تضمین کیفیت او اعتبار ورکولو ریاست له خوا د پوهنتون په (PDC) مرکز کې جوړ شوى، د ننګرهار پوهنتون سربېره د ختیزو ولایتونو د دولتي او خصوصي پوهنتونونو او لوړو زده کړو موسسو ۲۵ تنه مسؤلین او استازي برخه لري.
د ورکشاپ د پرانيستې پر مهال د ننګرهار پوهنتون رئیس پوهاند دوکتور خلیل احمد بهسودوال په علمي او تحصیلي موسساتو کې د تضمين کيفيت او اعتبار ورکولو ملي پروسې په اړتیا او ارزښت خبرې وکړې او ددغه ورکشاپ جوړېدل يې په اړونده برخه کې ګټور ګام وباله.
نوموړي وويل: د ختیزو ولایتونو دولتي او خصوصي پوهنتونونه د تضمین کیفیت او ارزونې په بېلابېلو پړاوونو کې قرار لري، چې په یاده برخه کې د عامه پوهاوي دا روزنیز ورکشاپ به د دوی لپاره د چمتووالي په برخه کې ګټور او اغېزمن تمام شي.
د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي په خپله وینا کې د ورکشاپ د محتوا او څرنګوالي په اړه معلومات ورکړل او زیاته یې کړه، چې د لوړو زده کړو وزارت رهبري د تحصیلي موسساتو د کیفیت ښه والي او معیاري کېدو په برخه کې په پوره ژمنتیا او جدیت ګامونه اخلي.
ښاغلي وحیدي د ننګرهار پوهنتون له ادارې مننه وکړه، چې ددې ورکشاپ دایرېدو ته یې زمینه برابره کړه او له ګډونوالو استادانو يې غوښتنه وکړه، چې ترې اعظمي ګټه پورته کړي.
د یادونې وړ ده، چې د ورکشاپ د روزنې چارې د لوړو زده کړو وزارت د تضمین کیفیت او اعتبار ورکولو ریاست د مرکزي بورد د غړو پوهاند محمد انور سراج، پوهاند دوکتور امان الله فقیري او د ننګرهار پوهنتون د تضمین کیفیت او اعتبار ورکولو داخلي واحد مشر پوهندوی رضوان الله ممله وال له خوا پر مخ وړل کېږي.
