د ننګرهار پوهنتون ژبو او ادبیاتو پوهنځي د چینايي ژبې مرکز څخه په لومړۍ دوره کې ۱۵ تنه محصلین فارغ شول.
د پوهنتون د مسؤلینو په وینا، یاد محصلین یې د کنفسیوس انستیتیوت په همکارۍ د دوه کلونو په موده کې د چینايي ژبې د زده کړې په برخه کې روزلي دي.
په همدې مناسبت د ژبو او ادبیاتو پوهنځي د شهید پوهاند مسعود نېکبخت د غونډو تالار کې غونډه جوړه شوې وه، چې د یاد پوهنځي د مسؤلینو او استادانو سربېره په کې د ننګرهار پوهنتون رئیس، مرستیالانو، د بېلابېلو پوهنځیو رئیسانو، استادانو او د کنفسیوس انستیتیوت استازو برخه لرله.
غونډې ته د وینا پر مهال د ننګرهار پوهنتون رئیس پوهاند دوکتور خلیل احمد بهسودوال د کنفسیوس انستیتیوت له مشرتابه مننه وکړه، چې له تېرو څلورو کلونو راهیسې د چینايي ژبې د زده کړې په برخه کې د ننګرهار پوهنتون سره مرسته او همکاري کوي.
پوهاند بهسودوال فارغو محصلینو ته مبارکي وویله او د کنفسیوس انستیتیوت له مسؤلینو یې غوښتنه وکړه، چې د چینايي ژبې یاد کورس دې د ادبیاتو پوهنځي په چوکاټ کې په یوه دیپارتمنت بدل کړي.
د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال پوهنیار قاضي خالد صداقت چين د افغانانو ځواکمن ګاونډى هېواد ياد کړ، چې د تاريخ په اوږدو کې يې ورسره علمي، کلتوري او سوداګريزې اړيکې لرلې دي.
نوموړي زیاته کړه: د چينايي ژبې زده کړه او د هېواد په کچه ورته نورې برنامې به يادې اړيکې نورې هم پياوړې کړي.
د کنفسیوس انستیتیوت مشر پوهنیار حمید ننګرهار پوهنتون د هېواد له سترو پوهنیزو مرکزونو یاد کړ، چې په وینا یې، اداره یې ورسره د متقابلو علمي همکاریو لرلو لېوالتیا لري.
نوموړي د دواړه ادارو ترمنځ د علمي اړیکو پر پراختیا او پیاوړتیا ټینګار وکړ او زیاته یې کړه، چې د ننګرهار پوهنتون وړاندیز به له خپلو مشرانو سره شریک کړي.
د غونډې په وروستۍ برخه کې د پوهنتون د مسؤلینو او راغلو مېلمنو له خوا فارغانو ته د فراغت سندونه ورکړل شول.
