د ننګرهار پوهنتون ساینس پوهنځي له خوا په (کامل لمونځ اسانه لارښود) کتاب کې د اخیستې رقابتي ازموینې ممتاز محصلین تقدیر شول.
یاده رقابتي ازموینه د ساینس پوهنځي او الصارم فکري او فرهنګي ادارې په ګډو هڅو ددې پوهنځي له ۳۰۰ تنو محصلینو اخیستل شوې وه، چې پایلې یې د یوې غونډې په ترڅ کې اعلان شوې.
په همدې مناسبت ساینس پوهنځي کې ستاینغونډه جوړه شوې وه، چې په کې د ننګرهار پوهنتون د علمي چارو مرستیال پوهندوی مولوي احسان الله ناصح، د ساینس پوهنځي رئیس پوهنمل رفیع الله رفیع، د ننګرهار د ځوانانو چارو آمر قاري محمد اصف شېرزاد، د ساینس پوهنځي استادانو، د محصلانو خدمتونو انسجام امریت مسؤلینو او ګڼ شمېر محصلینو ګډون کړی و.
غونډې ته د وینا پر مهال د ننګرهار پوهنتون د علمي چارو مرستیال پوهندوی مولوي احسان الله ناصح د محصلینو د پوهې کچې زیاتوالي او فکري رغښت لپاره د رقابتي او روزونکو برنامو جوړول غوره ابتکار وباله او د یادې سیالۍ چمتو کوونکو څخه یې مننه وکړه.
نوموړي زیاته کړه: محصلین باید د خپلو مسلکي زده کړو سربېره د خپل دین، تاریخ او فرهنګ نه هم اګاه واوسي او په دې برخه کې کافي مطالعه او پوهه ولري.
د ساینس پوهنځي د فرهنګي کمېټې مسؤل استاد پوهنیار محمد داؤد فیضي د ازموینې د پایلو اعلان پر مهال وویل: په یاده ازموینه کې د ساینس پوهنځي له بېلابېلو څانګو ۳۰۰ تنو محصلینو ګډون کړی ؤ، چې له دې ډلې ۲۰ تنه هغه محصلین، چې لوړې نمرې یې اخیستې وې، د جوایزو وړ وشمېرل شول.
د غونډې په پای کې د پوهنتون د مسؤلینو، مېلمنو او استادانو له لوري د ازموینې لوړو نمرو اخیستونکو ته جوایز ووېشل شول، چې لومړي مقام ګټونکي ته لپټاپ کمپیوټر، دویم مقام ګټونکي ته الفجر ساعت، درېیم مقام ګټونکي ته ځیرک موبایل او پاتې نورو ته جامې ورکړل شوې.
