د ننګرهار پوهنتون د علمي چارو مرستیال د لوړو زده کړو وزارت علمي معین سره په دې پوهنتون کې د اسلامي ثقافت په اړه د جوړېدونکي ملي کنفرانس په اړه مشورتي غونډه وکړه.

د ننګرهار پوهنتون د علمي چارو مرستیال پوهندوی مولوي احسان الله ناصح د لوړو زده کړو وزارت علمي معین دوکتور لطف الله خیرخواه سره (د هېواد په پوهنتونونو کې د اسلامي ثقافت تدریس، ارزښت او اغېزې) تر سرلیک لاندې ملي کنفرانس په اړه، چې ټاکل شوې ده نږدې راتلونکي کې د ننګرهار پوهنتون په کوربتوب ترسره شي، مشورتي غونډه وکړه.
د مجلس پر مهال ښاغلي ناصح دکنفرانس په اړه د لازم چمتوالي، ترلاسه شویو مقالو او د کنفرانس اړوند نورو موضوعاتو په اړه معلومات ورکړل.
د لوړو زده کړو وزارت علمي معین دوکتور لطف الله خیرخواه د کنفرانس په اړه د پوهنتون پر چمتوالي خوښي وښوده او یاده برخه کې یې د پوهنتون  علمي چارو مرستیال ته اړینې لارښوونې او سپارښتنې وکړې، چې د نوموړي له خوا ورته د لازمو اجرااتو ډاډ ورکړل شو.
د یادونې وړ ده، د راتلونکې جدي میاشتې تر ۳۰ نېټې پورې یاد ملي کنفرانس ته مقالې منل کېږي او له هغې وروسته به د کنفرانس د دایرېدو نېټه او ځای معلوم شي.