د ننګرهار پوهنتون او امام ابوحنیفه رحمه الله دیني جامعې نوي رئیسان د یادو ادارو کارکوونکو ته ور وپېژندل شول.
د افغانستان اسلامي امارت د زعیم عالیقدر امیرالمؤمنین حفظه الله تعالی و رعاه د حکم په اساس د امام ابوحنیفه رحمه الله دیني جامعې مخکینی رئیس دوکتور مفتي عبدالوارث بسام د ننګرهار پوهنتون د نوي عمومي رئیس په توګه ټاکل شوی، چې نن ورځ د یوې سترې غونډې په ترڅ کې د امام ابوحنیفه رحمه الله دیني جامعې د نوي رئیس شیخ انعام الله مدني سره یو ځای رسماً معرفي شو.
په همدې مناسبت د ننګرهار پوهنتون د غونډو په تالار کې مراسم جوړ شوي وو، چې د ننګرهار پوهنتون او امام ابوحنیفه رحمه الله دیني جامعې مشرتابه، استادانو او کارکوونکو سربېره په کې د ولایت مقام استازو، د بېلابېلو امارتي ادارو مسؤلینو او علماء کرامو برخه اخیستې وه.
د ننګرهار پوهنتون عمومي رئیس دوکتور مفتي عبدالوارث بسام او د امام ابوحنیفه رحمه الله دیني جامعې رئیس شیخ انعام الله مدني د خپلو ویناوو په ترڅ کې دنده امتیاز او منصب نه بلکې دروند مسؤلیت وباله او د اسلامي امارت د زعیم عالیقدر امیرالمؤمنین (حفظه الله تعالی و رعاه) او د لوړو زده کړو وزارت محترم مقام د باور څخه د مننې ترڅنګ یې ژمنه وکړه، چې ورسپارل شوي مسؤلیتونه به د اسلامي ارشاداتو او نافذه قوانیو په رڼا کې په ښه توګه ترسره کړي.
د ننګرهار د علماوو شورا رئیس شیخ حضرت جان حنفي، د ولایت مقام د کارکوونکو چارو رئیس مولوي عبدالله ساجد، د امام ابوحنیفه رحمه الله ديني جامعې د افتاء او قضاء څانګې استاد مفتي شاهدالله حقاني او د ننګرهار پوهنتون استاد شیخ محمد ضیاءالله حکیمي د غونډې نور ویناوال وو، چې په خپلو خبرو کې یې په اسلامي نظام کې د خدمت او اطاعت ارزښت روښانه کړ او هیله یې څرګنده کړه چې نوي رئیسان به د پوهنتون او جامعې لپاره د پام وړ خدمت او پرمختګ رامنځته کړي.
نوموړو دغه راز په تېر کې د پوهنتون او جامعې د نویو رئیسانو ترسره کړي فعالیتونه او خدمتونه وستایل، راتلونکي کې یې ورته د هر راز همکارۍ ډاډ ورکړ او د ښه خدمت کولو دعا یې ورته وکړه.
د غونډې دویمه برخه کې دواړو رئیس صاحبانو ته د مشرانو او مسؤلینو له خوا د هغوی د ښو خدمتونو او کړنو د تقدیر په موخه ستاینلیکونه ورکړل شول او غونډه د ننګرهار پوهنتون ژبو او ادبیاتو پوهنځي د رئیس پوهنیار حافظ سید محمد قاسم هاشمي په دعا سره پای ته ورسېده.
سرچینه: د نشراتو او عامه اړیکو امریت
