په جلال آباد ښار کې د ايران اسلامي جمهوریت جنرال قونسل د ننګرهار پوهنتون له رئيس سره وليدل
په جلال آباد ښار کې د ايران اسلامي جمهوريت جنرال قونسل مجید صادقي دولت آبادي د ننګرهار پوهنتون رئيس پوهاند دوکتور خلیل احمد بهسودوال سره ولیدل او د متقابلو علمي اړیکو رامنځته کېدو او پیاوړتیا په اړه یې خبرې اترې وکړې.
په ياده لیدنه کې د پوهنتون د علمي چارو مرستیال پوهندوی دوکتور محمد حامد کډوال، د محصلانو چارو مرستيال پوهندوى سيد اکرم هاشمي، د ژبو او ادبیاتو پوهنځي رئیس پوهنمل محمد عارف حازم او د یاد پوهنځي د دري څانګې آمر پوهنمل سیدآقا مسافر او استادانو هم برخه لرله.
د ننګرهار پوهنتون رئيس په تېر کې د ايران اسلامي جمهوريت له مرستو مننه وکړه، چې له ننګرهار پوهنتون سره يې په بېلابېلو برخو کې کړي او په راتلونکې کې یې د دري څانګې او د پوهنتون د نورو برخو د پیاوړتیا په برخه کې د مرستې او د نوموړي هېواد له پوهنتونونو سره د علمي اړیکو د رامنځته کېدو غوښتنه وکړه.
ښاغلي صادقي ننګرهار پوهنتون د افغانستان ارزښتمن علمي کانون یاد کړ، چې په وینا یې، زمونږ زیات علمي مرکزونه ورسره د ګډو علمي همکاریو لېوالتیا لري.
نوموړي د ننګرهار پوهنتون مشرتابه ته په اړونده برخه کې د همکارۍ ډاډ ورکړ او ژمنه يې وکړه، چې وړاندیزونه به یې د خپل هېواد د لوړو زده کړو له مسؤلينو سره شریک کړي.
د مجلس په پاى کې راغلي پلاوي د ژبو او ادبیاتو پوهنځي د دري څانګې نه ليدنه وکړه.
