د کرنې پوهنځي د غونډو تالار د ارواښاد استاد پوهنوال سیداجان عتیق عبدیاني په نوم ونومول شو
د ننګرهار پوهنتون کرنې پوهنځي د غونډو تالار د دې پوهنځي د مخکېني رئیس او استاد ارواښاد پوهنوال سیداجان عتیق عبدیاني په نوم له نومول کېدو وروسته رسماً پرانیستل شو.
د پرانیستې په مراسمو کې د ننګرهار پوهنتون د رئیس، مرستیالانو، د بېلابېلو پوهنځیو رئیسانو، استادانو او اداري منسوبينو سربېره د ننګرهار ولایت مقام مالي او اداري مرستیال او نورو مسؤلینو هم برخه لرله.
د پرانیستې پر مهال د ننګرهار پوهنتون رئيس پوهاند دوکتور خليل احمد بهسودوال ارواښاد عبدیاني په هېواد او ولس مين شخصیت ياد کړ، چې په وينا يې، د عمر زیاته برخه يې د کرنیز سکتور د پیاوړتیا او په یاده برخه کې د هېواد د بچيانو په روزنه او خدمت کې تېره کړه.
نوموړي وويل: د ارواښاد استاد په نوم ددې تالار له نومول کېدو یې موخه د هغه د ترسره کړیو خدمتونو تقدیر او د نوم ژوندي پاتې کېدل دي.
د ننګرهار ولایت مقام مالي او اداري مرستیال پوهنوال ببرک میاخېل د ارواښاد عبدیاني په علمي او اکاډمیکو فعالیتونو او کارنامو رڼا واچوله او د هغه په نوم یې د تالار نومول د پوهنتون د ادارې پر ځای ګام وباله.
د ارواښاد عبدیاني د کورنۍ په استازيتوب د نوموړي مشر زوی کیهان عتیق عبدیاني د پوهنتون له مشرتابه او د کرنې پوهنځي له مسؤلینو او استادانو مننه وکړه، چې ارواښاد استاد یې هیر کړی نه دی او په نوم یې د کرنې پوهنځي یوه برخه ونوموله.
د غونډې په دویمه برخه کې د مسؤلینو او استادانو له خوا د کرنې پوهنځي د موټرو تم ځای هم پرانیستل شو.