د ننګرهار پوهنتون محصلینو ته د احتکار په اړه د عامه پوهاوي سيمینار وړاندې شو.
د ننګرهار پوهنتون د شرعیاتو او اقتصاد پوهنځیو محصلینو ته د احتکار پېژندنې، لاملونو، دنیوي او اخروي زیانونو، مخنيوي او ټولنیزو ـ اقتصادي ستونزو په هکله معلوماتي سيمینار دایر شو.
یاد سيمینار د محصلانو خدمتونو او همغږۍ امریت له خوا د امام ابوحنیفه (رحمه الله) د غونډو په تالار کې جوړ شوی و، چې لسګونو تنو محصلینو په کې ګډون او د موضوع په اړه معلومات حاصل کړل.
سيمینار د ننګرهار پوهنتون شرعیاتو پوهنځي استاد مولوي نصرت الله جلالي وړاندې کړ او د احتکار په اړه یې هر اړخیز معلومات له محصلینو سره شریک کړل.
په سيمینار کې وویل شول، اسلام احتکار، یعنې د خلکو د اړتیا وړ توکو قصدي ذخیره کول او د قیمتونو د لوړوالي په وخت کې یې بازار ته عرضه کول، چې خلکو ته اقتصادي ستونزې جوړوي او هم د اجناسو د کمښت سبب ګرځي، حرام ګڼي، خو عادي ذخیره چې خلکو ته زیان ونه رسوي، احتکار نه بلل کېږي.
په یاد سیمینار کې د انصاف، امانتدارۍ، سالم تجارت، د مشتریانو، عامو مسلمانانو حقونو او ټولنیز مسؤلیت په اړه هم خبرې وشوې او له محصلینو وغوښتل شول، چې د احتکار زیانونو په اړه خلکو ته پوهاوی ورکړي او مخنیوي کې یې خپل رول ادا کړي.
سرچینه: د اطلاعاتو، نشراتو او عامه اړیکو امریت
