د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.
په نوموړي کاري ناسته کې، چې د سلواغې په ۱۰ مه نېټه په ریاست مقام کې ترسره شوه او د پوهنتون مرستیالانو، د بېلابېلو پوهنځيو او تدریسي روغتون رئيسانو او استادانو په کې برخه لرله، د پوهنتون د علمي او تدریسي چارو، علمي ترفیعاتو، تقرر او انفکاک کیسونو او يو شمېر نورو مسايلو په اړه بحث او پرېکړې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال په تېره یوه میاشت کې د پوهنتون ادارې د کړنو او لاسته راوړنو په اړه د شورا غړو ته معلومات ورکړل.
نوموړي دغه راز د پوهنځیو او تدریسي روغتون له رئیسانو مننه وکړه، چې د تضمین کیفیت پروسې د تطبیق په برخه کې یې هلې ځلې کړي، چې له برکته یې د لوړو زده کړو وزارت د تضمین کیفیت ریاست د پلاوي له خوا کلنۍ بیاکتنه او ارزونه په مثبته توګه ترسره شوه.
د پوهنتون رئیس زیاته کړه، چې تضمین کیفیت یوه دوامداره پروسه ده او د پوهنتون درانه استادان او مسؤلین باید د کیفیت ښه والي لپاره لا زیات کار او هڅې وکړي.
د ننګرهار پوهنتون د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح او د محصلانو چارو مرستیال حافظ سید محمدقاسم هاشمي په خپلو خبرو کې د خالي بستونو ډکولو او د استخدام پروسې چټکوالي، د فراغت جدولونو ترتیبولو او لېږلو، د دیپارتمنتونو ټاکنو ترسره کولو، نیالګیو کېنولو او د HEMIS سیستم د ښه تطبیق په اړه د مجلس ګډونوالو ته لازمې لارښوونې وکړې، چې د هغوی له خوا د اجرااتو ډاډ ورکړل شو.
د مجلس په دویمه برخه کې د ازموینو کمېټې د غړي پوهنمل عباد الله ناصري له خوا د ۱۴۰۱ تحصیلي کال د وروستي سمستر ازموینو ګزارش او د چاپېریال ساتنې کمېټې د مشر پوهنوال سید اکرم هاشمي له خوا د یادې کمېټې د کړنو او لاسته راوړنو ګزارشونه وړاندې شول، چې د شورا د غړو د تائید وړ وګرځېدل.
د مجلس په وروستۍ برخه کې د ننګرهار او د کونړ سید جمال الدین افغاني پوهنتونونو د علمي ترفیعاتو، تقرر او انفکاک ۳۲ کیسونو، د استادانو او محصلینو پر عرایضو او د ځینو نورو متفرقه مسايلو په اړه بحث او پرېکړې وشوې.
