د ننګرهار پوهنتون د کیفیت لوړاوي او اعتبار ساتنې مرکزي کمېټې غونډه وکړه.
د کمېټې په دې ناسته کې، چې د پوهنتون علمي چارو مرستیال په مشرۍ او د کیفیت لوړاوي داخلي واحد مسؤل او کمېټې غړو په حضور کې ترسره شوه، د کمېټې په روانو فعالیتونو، پوهنځیو او څانګو کې د خودي ارزونې ترسره کولو باندې بحث وشو او یو شمېر راپورونه شریک او تائید شول.
د ننګرهار پوهنتون د علمي چارو مرستیال پوهنوال مولوي احسان الله ناصح مجلس ته په وینا کې وویل، د کیفیت لوړاوي پروسې ټاکلي معیارونه په بشپړه توګه پلي کول د پوهنتون علمي، تدریسي، څېړنیزو او اداري چارو معیاري او د باور وړ کېدو لپاره حیاتي ارزښت لري او د پوهنتون اعتبار، سیالۍ او پرمختګ لپاره اساس بلل کېږي.
نوموړي سپارښتنه وکړه، چې راتلونکې بهرنۍ ارزونې لپاره دې په کامله توګه چمتووالي ونیول شي او په روانو چارو کې د شته جزوي ستونزو موندلو او لمنځه وړلو په پار دې په ټولو پوهنځیو کې خودي ارزونې پیل شي.
د غونډې پر مهال د ننګرهار پوهنتون د کیفیت لوړاوي داخلي واحد مسؤل پوهنمل حنیف الله باوري د کیفیت لوړاوي او اعتبار ساتنې امریت د کړنو لنډ راپور شریک کړ او همدارنګه د کمېټې غړو د (پي پي ار) او (ای پي ایم) راپورونو تائید او یو لړ نورو مسایلو په اړه بحثونه او نظریات وړاندې کړل.
