د ننګرهار پوهنتون د اړوندو پوهنځیو تدریسي او اجرائیه مديرانو ددې پوهنتون له مشرتابه سره نوبتي غونډه وکړه.
د ننګرهار پوهنتون د ۱۳ ګونو پوهنځیو تدریسي او اجرائیه مدیرانو د ننګرهار پوهنتون رئیس پوهاند دوکتور خلیل احمد بهسودوال او د محصلانو چارو مرستیال پوهنیار طیب الله زاهد سره د چارو د ښه والي او همغږۍ په موخه نوبتي غونډه وکړه.
په نوموړې کاري ناسته کې، چې د استادانو او محصلانو چارو، محصلانو خدمتونو انسجام، معلوماتي ټکنالوژۍ او کتابتون، بدني روزنې او حقوقي کلینیک آمرینو هم په کې برخه لرله، د پوهنتون مشرتابه د قوانینو، لوایحو او مقرراتو په رڼا کې په خپل وخت د چارو د ترسره کولو، مراجعینو سره د نېک چلند، فساد مخنیوي او اړوندو چارو د لاښه والي او چټکتیا په اړه جدي لارښوونې وکړې.
پوهاند بهسودوال د غونډې برخوالو ته هدایت وکړ، چې د لوړو زده کړو محترم وزارت د هدایت او د پوهنتون ادارې له پرېکړې سره سم د محصلینو، استادانو او کریکولم اړوند ټول مواد باید په سافټ بڼه د HEMIS په انلاین سیستم کې ځای پر ځای کړي.
د محصلانو چارو مرستیال پوهنیار طیب الله زاهد د خپلې وینا پر مهال تدریسي او اجرائیه مدیران او د محصلانو چارو اړوند نور شعبات خپل منځي همغږۍ ته راوبلل او د محصلینو او فارغانو د چارو په برخه کې یې له هغوی څخه د جدي کار او پر وخت اجرااتو غوښتنه وکړه.
پوهنیار زاهد د مجلس ګډونوالو ته سپارښتنه وکړه، چې د پوهنتون ټولو محصلینو ته د هویت کارتونو د وېش، د کریډیټ سیستم په اړه د لازمو لارښوونو، په منظمه توګه د اسنادو ارشیف کولو او په خپل وخت د بدل اعاشې او نورو راپورونو ورکړې په برخه کې اړین ګامونه واخلي.
د مجلس په دویمه برخه کې د معلوماتي ټکنالوژۍ او کتابتون آمر سید اجمل نقشبندي HEMIS سیستم په اړه معلوماتي پریزنټیشن وړاندې کړ او د ګډونوالو پوښتنو ته یې ځوابونه وویل.
د غونډې په وروستۍ برخه کې د پوهنتون مشرتابه د ګډونوالو آمرینو او مدیرانو ستونزې او وړاندیزونه واورېدل او د حل په برخه کې یې د اجرااتو او همکارۍ ژمنه وکړه.
