د لوړو زده کړو محترم وزیر صاحب د ننګرهار پوهنتون له منسوبینو سره غونډه وکړه.
د افغانستان اسلامي امارت د لوړو زده کړو محترم وزیر شیخ الحدیث مولوي نداء محمد ندیم حفظه الله د یو پلاوي په ملتیا ننګرهار پوهنتون ته د خپل رسمي سفر په ترڅ کې د دې پوهنتون له رهبرۍ، استادانو او اداري کارکوونکو سره غونډه وکړه او بېلابېلو برخو کې یې هغوی ته لارښوونې او سپارښتنې وکړې.
د غونډې ښه راغلاست وینا پرمهال د ننګرهار پوهنتون رئیس شیخ انعام الله مدني د لوړو زده کړو محترم وزیر او ورسره مل پلاوي ته ښه راغلاست ووایه، د راتګ یې ورڅخه مننه وکړه او د هېواد لوړو زده کړو نظام په معیاري کېدو او پراختیا کې یې د قدرمن وزیر صاحب کړنې او ابتکارات وستایل.
د لوړو زده کړو قدرمن وزیر شیخ الحدیث مولوي نداء محمد ندیم صاحب د خپلو خبرو پر مهال د شرعي مقاصدو تحقق او اسلامي نظام استحکام لپاره د پوهنتون استادان او منسوبین مهم قشر وباله او ویې ویل، چې استادان باید په خپلو هڅو په پوهنتونونو کې داسې علمي او روزنیز چاپېریال رامنځته کړي، چې هم د دیني ارزښتونو ساتنه وکړي او هم د هېواد په ګټه فکري او مسلکي ځوانان تربیه کړي.
قدرمن وزیر شیخ صاحب د محصلینو نظري او عملي زده کړو په توازن او جدي پاملرنې ټینګار وکړ او زیاته یې کړه، چې اسلامي نظام له قدرمنو استادانو دا تمه لري، چې محصلین د تخصص، مهارت او مسلک تر څنګ له دیني پلوه هم د ټولنې اړتیاوو ته په کتو داسې وروزي، چې د اسلام او هېواد په ګټه کارونه ترسره او همدارنګه کاري وړتیا، سالم فکر، حسنه اخلاق او د خدمت پیاوړې روحیه ولري.
د لوړو زده کړو محترم وزیر په وینا د اسلامي امارت فرامین، قوانین او اوامر د دین له لارښوونو سرچینه اخلي، ورباندې عمل او اطاعت د دنیا او اخرت کامیابي تضمینوي او د ټولنې عدالت، ثبات او پرمختګ لپاره بنسټیز رول لري.
هغه د خپلو خبرو په پای کې ژمنه وکړه، چې د استادانو او محصلینو مسلکي ظرفیت لوړونې لپاره به اغېزناکې علمي برنامې چمتو، د پوهنتونونو لابراتوارونه او د عملي کار ساحې لا مجهزې، اړین درسي وسایل ورته خریداري او هر راز ستونزو ته رسیده ګي وکړي.
د خوست ولایت د جهادي مدرسې مهتمم شیخ القران والحدیث مولوي محمد افضل حُسیني غونډې ته په خپله وینا کې د استادانو په موقف او منزلت خبرې وکړې او د ټولنې افرادو په دیني، علمي، فکري او اخلاقي روزنه کې یې د هغوی د نقش په اهمیت وینا وکړه.
غونډه د ننګرهار پوهنتون د ژبو او ادبیاتو پوهنځي رئیس پوهنیار حافظ سید محمد قاسم هاشمي په دعا سره پای ته ورسېده.
