د ختیز زون د لوړو زده کړو بنسټونو مسؤلینو سره د اسلامي امارت د لوړو زده کړو عالي کمېسون مشرتابه پلاوي مشورتي غونډه وکړه.

nu_admin
سه‌شنبه ۱۴۰۰/۶/۲ - ۹:۳۵
image

 

د افغانستان د اسلامي امارت د لوړو زده کړو عالي کمېسون مشر مولوي عبدالباقي حقاني د یوه پلاوي په مشرۍ په ختیزو ولایتونو کې د دولتي او خصوصي پوهنتونونو او د لوړو زده کړو او نیمه لوړو زده کړو موسسو د مسؤلینو، استادانو او اداري کارکوونکو سره مشورتي ناسته وکړه.

یاده غونډه، چې د ننګرهار پوهنتون په کوربتوب جوړه شوې وه، ګډونوالو یې د تحصیلي نظام د بهبود او ښه والي په اړه خپل نظرونه او وړاندیزونه د امارت د مسؤلینو سره شریک کړل.

د غونډې د پرانیستې وینا پر مهال د ننګرهار پوهنتون رئيس پوهاند دوکتور خليل احمد بهسودوال راغلي پلاوي ته ښه راغلاست ووایه او د ننګرهار، کونړ، لغمان او نورستان پوهنتونونو د اوس مهالي وضعیت، اکاډمیکو فعاليتونو او لاسته راوړنو په اړه یې معلومات ورکړل.

پوهاند بهسودوال د ختیز زون پوهنتونونو د مسؤلینو او استادانو په استازولۍ په پوره ژمنتیا د دندو او مسؤلیتونو د ترسراوي د ډاډ تر څنګ د امارت د لوړو زده کړو عالي کمېسون مشرتابه ته وړاندیز وکړ، چې د هېواد د لوړو زده کړو اوسنی سیستم دې وساتل شي او د لا پیاوړتیا لپاره یې باید هلې ځلې وشي.

د ننګرهار پوهنتون د استادانو اتحادیې رئیس پوهنمل سید احمد هاشمي، په ختیځ کې د خصوصي پوهنتونونو او لوړو زده کړو موسسو د اتحادیې مشر او د خراسان پوهنتون رئیس دکتور احمد طارق کمال، د اسلامي امارت د لوړو زده کړو عالي کمېسون د ننګرهار ولایت مسؤل محمد شاکر وحیدي او د ښځینه استادانو په استازیتوب پوهنیار خاطره بابکرخېل د غونډې نور ویناوال وو، چې د تحصیلي بنسټونو، استادانو، محصلینو او اداري کارکوونکو وړاندیزونه او ستونزې یې د امارت د لوړو زده کړو کمېسون د مشرتابه سره شریکې کړې.

د افغانستان د اسلامي امارت د لوړو زده کړو عالي کمېسون مشر مولوي عبدالباقي حقاني د خپلې وینا پر مهال اسلامي شریعت د ژوند لپاره یو بشپړ او کامل نظام وباله او زیاته یې کړه، چې دیني او عصري علوم د یوې سکې دوه مخونه دي.

نوموړي وویل: د اسلامي امارت هڅه داده، چې د دواړو برخو د پیاوړتیا لپاره کار وکړي او په دې برخه کې د علمي بنسټونو او استادانو مرستې او مشورو ته اړتیا ده، چې د خپل تحصیلي نظام او په ټوله کې د هېواد د پرمختګ او ابادۍ لپاره لاس په کار شي.

ښاغلي حقاني په پوهنتونونو او تحصیلي بنسټونو کې د ټولو هغو کړنو، چې د اسلامي شریعت او افغاني اصیل فرهنګ سره په ټکر کې وي، د مخنیوي سپارښتنه وکړه او استادانو او اداري کارکوونکو (نارینه او ښځینه و) ته یې ډاډ ورکړ، چې د پخوا په څېر خپلو دندو او مسؤلیتونو ته دوام ورکړي.

د اسلامي امارت د لوړو زده کړو عالي کمېسون مشرتابه پلاوي د پوهنتونونو او تحصیلي بنسټونو مسؤلینو او استادانو ته لارښوونه وکړه، چې د تحصیلي نظام او بنسټونو د لا ښه والي او غنامندۍ لپاره دې خپل نظرونه ورسره په لیکلي توګه شریک کړي.

تازه خبرونه

یکشنبه ۱۴۰۱/۵/۲۳ - ۸:۲۴
Background image

ننګرهار پوهنتون کې (د مور په شېدو سره د ماشوم د تغذیې اوونۍ) د يوې سترې غونډې په ترڅ کې ونمانځل شوه.

 

ياده نمانځغونډه، چې د دې پوهنتون د طب پوهنځي فرهنګي کمېټې له خوا د سپین غر لوړو زده کړو موسسې په تخنیکي مرسته جوړه شوې وه، د ننګرهار پوهنتون او طب پوهنځي د مشرتابه او استادانو سربېره. . .

یکشنبه ۱۴۰۱/۵/۲۳ - ۸:۲۰
Background image

د جلال آباد ښاروالۍ د تخنیکي او سکتوري چارو رئیس د ننګرهار پوهنتون مشرتابه سره ولیدل.

 

د جلال آباد ښاروالۍ د تخنیکي او سکتوري چارو رئیس انجنیر دوست محمد چهاردیوال د ننګرهار پوهنتون رئیس پوهاند دوکتور خلیل احمد بهسودوال سره ولیدل.

په یاده لیدنه کې، چې د لوړو زده کړو. . .

دوشنبه ۱۴۰۱/۵/۱۷ - ۱۰:۹
Background image

په ختیځ کې د دولتي او خصوصي پوهنتونونو مسؤلینو او استادانو د ملګرو ملتونو له خوا د لوړو زده کړو پر سرپرست وزیر د لګېدلو بندیزونو په غبرګون کې اعتراضیه غونډه وکړه.

 

یاد کنفرانس، چې د محرم په ۹مه نېټه د ننګرهار پوهنتون په کوربتوب ترسره شو، ویناوالو یې د غندنې تر څنګ د هېواد په تحصیلي نظام د یادو بندیزونو د ناوړه اغېزو او بدو پایلو په اړه مقالې او. . .

BACK TO NEWS