د ننګرهار پوهنتون کرنې پوهنځي ماسترۍ درې پروګرامونو لپاره له ۹۲ تنو کاندیدانو د کانکور ازموینه واخیستل شوه.
د ازموینو ملي ادارې له خوا د ننګرهار پوهنتون کرنې پوهنځي دریو څانګو (هارتیکلچر، اګرانومي او د کرنیزو تولیداتو ځنځیري ارزښت مدیریت) ماسترۍ برنامو لپاره له ۹۲ تنو ګډونوالو د کانکور ازموینه واخیستل شوه.
په همدې مناسبت کرنې پوهنځي کې د ازموینې د پرانیستې مراسم جوړ شوي وو، چې د ننګرهار پوهنتون د علمي چارو مرستیال، د پوهنځي مسؤلینو، استادانو او ازموینو ملي ادارې څخه راغلي پلاوي په کې برخه لرله او په ترڅ کې یې د ټولو ګډونوالو په حضور کې د پوښتنپاڼو د بکسونو قلفونه خلاص او رسماً ازموينه پيل شوه.
د ننګرهار پوهنتون د علمي چارو مرستیال پوهنوال مولوي احسان الله ناصح، د ازموینو ملي ادارې د انسجام رئیس دوکتور میر افضل کوټوال او نورو مسؤلینو د ازموینې صحنې څخه د لیدنې پر مهال ګډونوالو ته د شفافیت او په ټاکلي وخت د پایلو اعلان ډاډ ورکړ.
د یادونې وړ ده، چې ننګرهار پوهنتون دا مهال د ماسترۍ ۱۰ او د دوکتورا ۴ برنامې لري، چې نږدې ۷۰۰ تنه محصلین په کې په زده کړو بوخت دي.
