د حقوقو او سیاسي علومو پوهنځي محصلینو ته په جزایي قضیه کې د ابتدائیه محکمې تمثیل وړاندې شو.
په یاده تمثیلي غونډه کې، چې د شرعیاتو پوهنځي د امام ابو حنیفه (رح) د غونډو په تالار کې جوړه شوې وه، محصلینو د محکمې چارو عملي ترسره کولو په برخه کې مختلف کردارونه ادا کړل او له دې کار څخه موخه دا وه، چې محصلین حقوقي او قضائي مسایل په عملي توګه وپېژني او د محکمې د پروسې په هکله تجربه ترلاسه کړي.
د حقوقو او سیاسي علومو پوهنځي د څلورم ټولګي ۳۶ تنو محصلینو ته یاده برنامه د محصلانو خدمتونو انسجام امریت اړوند حقوقي کلینيک عمومي مدیریت له خوا د ۳ میاشتو نظري او عملي زده کړو په پای کې د استاد پوهندوی صفي الله صالح عربزي په لارښوونه وړاندې شوه.
د برنامې د پرانیستې وینا پر مهال د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي تمثیلي محکمې ترسره کول د حقوقو او سیاسي علومو پوهنځي د محصلینو د عملي تدریس یوه مهمه برخه وبلله او زیاته یې کړه، چې دا ډول تمثیلونه کولی شي محصلینو ته د محاکمو د پروسې، قانوني مسایلو او استدلال کولو اړوند مهارتونه ور زده کړي.
نوموړي د برنامې له چمتو کوونکو او لارښود استاد څخه د یاد ګټور اقدام له کبله مننه وکړه او راتلونکي کې یې د بېلابېلو پوهنځیو محصلینو ته د مسلک اړوند د ورته برنامو جوړولو او عملي زده کړو پراختیا باندې ټینګار وکړ.
د یادونې وړ ده، چې په دې غونډه کې د محصلانو چارو مرستیال سربېره د یاد پوهنځي یو شمېر استادانو، د محصلانو خدمتونو انسجام امریت مسؤلینو او محصلینو ګډون کړی و.
