د ننګرهار پوهنتون رئيس د کرنې پوهنځي د تحقيقي پروژو څخه ليدنه وکړه.
د ننګرهار پوهنتون رئيس پوهاند دوکتور خلیل احمد بهسودوال په داسې حال کې، چې د ننګرهار ولایت د دولتي او خصوصي پوهنتونونو لپاره د لوړو زده کړو وزارت فوق العاده استازي قاضي خالد صداقت، د محصلانو چارو مرستیال پوهنوال سید اکرم هاشمي، د اداري او مالي چارو مرستیال حمیدالله احمدزي او د پوهنتون یو شمېر نورو استادانو یې ملتیا کوله، د کرنې پوهنځي د استادانو له تحقيقي پروژو ليدنه وکړه.
د ليدنې پر مهال د کرنې پوهنځي رئيس پوهندوی دوکتور رشاد احمد شېرزاد د یاد پوهنځي د څېړنيزو پروژو په اړه، چې د رومیانو څخه د روب جوړولو، د انارو او انګورو څخه په بېلابېلو ترکیبونو د ګډ شربت جوړولو، د ګلپیانو او براکولي ناروغیو د کنترول په موخه د دودیزو او کېمیاوي لارو چارو پرتلنه او نورو بېلابېلو موضوعاتو په اړه وې، د ننګرهار پوهنتون رئيس او ورسره پلاوي ته معلومات ورکړل.
د ننګرهار پوهنتون رئيس د يادو څېړنو په ترسراوي د خوښۍ څرګندونه وکړه او د کرنې پوهنځي له مسؤلینو او استادانو يې مننه وکړه، چې د تيورۍ ترڅنګ عملي چارو او څېړنو ته هم پاملرنه کوي.
