ننګرهار پوهنتون کې د ملي بیرغ ورځ ونمانځل شوه
د ننګرهار پوهنتون مشرتابه، استادانو، محصلینو او اداري کارکوونکو د یو لړ مراسمو په ترڅ کې د زمري ۷مه د ملي بیرغ ورځ ونمانځله.
په همدې مناسبت د ننګرهار پوهنتون سولې مرکز په نوښت د پوهنتون په انګړ کې غونډه جوړه شوې وه، چې د پوهنتون رئیس پوهاند دوکتور خلیل احمد بهسودوال، د علمي چارو مرستیال پوهندوی دوکتور محمد حامد کډوال، د محصلانو چارو مرستیال پوهندوی سید اکرم هاشمي، د اداري او مالي چارو مرستیال حمیدالله احمدزي، د پوهنتون د فارغانو شبکې مشر انجنیر خان محمد دوست، د بېلابېلو پوهنځیو رئیسانو، استادانو، اداري کارکوونکو او محصلینو په کې برخه لرله.
د ننګرهار پوهنتون رئیس پوهاند دوکتور خلیل احمد بهسودوال د غونډې برخوالو ته د ملي بیرغ ورځې مبارکي وویله او د بیرغ په ارزښت او تاریخي شالید یې خبرې وکړې.
نوموړي ملي بیرغ د افغانانو ملي هویت او تشخص، ملي ارزښت او د یووالي او اتحاد سمبول وباله، چې په وینا یې، احترام او درناوی یې د ټولو افغانانو ګډه ملي وجیبه ده.
د ژبو او ادبیاتو پوهنځي رئیس پوهنمل محمد عارف حازم د اسلامي شریعت له نظره د بیرغ په مقام او اهمیت خبرې وکړې او د اسلامي تاریخ په بېلابېلو پړاوونو کې یې د بیرغ په رول او ارزښت رڼا واچوله.
غونډه په ګران هېواد کې د تلپاتې او واقعي سولې د ټینګښت او د یو سوکاله، پرمختللي او اباد افغانستان د لرلو په هیلې او دعا پای ته ورسېده.
