د ننګرهار پوهنتون اداري مجلس ددې پوهنتون د رئیس په مشرۍ ترسره شو.
په یاده کاري ناسته کې، چې د لیندۍ په ۱۴ مه نېټه د پوهنتون په ریاست مقام کې ترسره شوه او ددې پوهنتون د علمي چارو، اداري او مالي چارو او محصلانو چارو مرستیالانو، د اړوندو پوهنځیو رئیسانو او آمرینو په کې برخه لرله، د پوهنتون اړوند پر بېلابېلو اداري مسایلو، مالي او تدارکاتي پروسو چټکتیا، د پوهنتون منسوبینو ستونزو حل او راتلونکو پلانونو خبرې او پرېکړې وشوې.
د مجلس د پرانیستې وینا پر مهال د ننګرهار پوهنتون رئيس شـیخ انعام الله مدني د پوهنځیو او اړوندو څانګو مسؤلینو ته د اصولو سره سم د اداري او تدریسي چارو د چټکتیا او معیاري کېدو لارښوونه وکړه.
نوموړي همدا راز د راتلونکو ازموینو لپاره د اړینو تدابیرو نیولو تر څنګ د محصلینو په خپل سر رخصتۍ او غیر حاضري د مخنیوي سپارښتنه وکړه.
د مجلس په دویمه برخه کې د اداري او مالي چارو مرستیال د تېر اداري مجلس د پرېکړو له مخې د ترسره کړیو اجرااتو او فعالیتونو راپور شریک کړ.
د مجلس په وروستۍ برخه کې د ننګرهار پوهنتون د علمي چارو مرستیال پوهندوی مولوي احسان الله ناصح، د اداري او مالي چارو مرستیال مفتي نعمت الله اعزازي او د محصلانو چارو مرستیال پوهنیار حافظ سید محمد قاسم هاشمي د مجلس له ګډونوالو سره په ګډه د اجنډا له مخې د پوهنتون بېلابېلو اداري او مالي موضوعاتو بحثونه او لازمې پرېکړې وکړې.
