ننګرهار پوهنتون کې (د بين الرشتوي څېړنو له لارې د علمي رهبرۍ او ځواکمنتوب پراختيا) تر سرلیک لاندې سیمینار وړاندې شو.
ياد علمي سيمينار په انګليستان کې د بولټن پوهنتون پروفيسر دوکتور عمران حُسين خان له لوري د ننګرهار پوهنتون د ۱۳ ګونو پوهنځيو د څېړنې کمېټو مسؤلينو او يو شمېر استادانو ته وړاندې شو.
له دې سيمينار څخه هدف د نړيوالو علمي او څېړنيزو مراکزو سره د پوهنتون د اکاډميکو اړيکو پراختيا، د څېړنيزو فعاليتونو او علمي هڅو کيفيت او مؤثريت ښه کول، د استادانو څېړنيزو مهارتونو او علمي رهبرۍ ته وده ورکول او په ټوله کې په سيمه ييزه او نړيواله کچه د پوهنتون د مطرح کېدو لپاره ګټور اقدامات ترسره کول و.
د سیمینار د پرانیستې وینا پر مهال د ننګرهار پوهنتون د علمي چارو مرستيال پوهندوی مولوي احسان الله ناصح د سيمينار پر اهميت او ګټو خبرې وکړې او د يادې موضوع له ارايه کوونکي پروفيسر يې مننه وکړه، چې د ننګرهار پوهنتون بلنه يې ومنله.
نوموړي د څېړنيزو فعاليتونو په پراختيا او نوښتونو ايجاد باندې ټينګار وکړ او نړيوالو معيارونو ته د رسېدو او علمي رهبرۍ تقويت په برخه کې يې د پوهنتون د ھڅو يادونه وکړه.
د انګليستان د بولټن پوهنتون پروفيسر دوکتور عمران حُسين خان د موضوع د تشريح پر مهال وويل: د بين الرشتوي څېړنو له لارې د علمي رهبرۍ او ځواکمنتوب پراختيا موضوع نړيوالو هېوادونو ته زيات اهميت لري او بېلابېلې پېچلې ستونزې يې د همدې لارې حل کړي دي.
نوموړي دغه راز د سيمينار موخه، اهميت، بين الرشتوي څېړنو تعريف، ګټې، علمي رهبرۍ مفهوم، د څېړنو نړيوال معيارونه، د ځواکمنتوب پراختيا لارې چارې، عملي مثالونه، تجارب، مشورې او نور مسايل شريک کړل او د ګډونوالو پوښتنو ته يې ځوابونه وويل.
