ننګرهار پوهنتون کې محصلینو ته ( په اسلامي تاریخ او تمدن کې د افغانانو ونډه ) تر سرلیک لاندې سیمینار وړاندې شو.
په نوموړي علمي سیمینار کې، چې د دې پوهنتون د محصلانو خدمتونو انسجام آمریت په ابتکار جوړ شوی و، د پوهنتون د بېلابېلو پوهنځیو سلګونه تنو محصلینو برخه لرله.
یاد سیمینار د افغانستان د علومو اکاډمۍ غړي محقق محمد کریم ادیب له لوري ارایه شو، چې پر مهال یې د اسلامي تاریخ په اوږدو کې د افغانانو د سرښندنو، کارنامو، افغاني فقهاوو او مفسرینو رول، د اسلامي نړۍ په پراختیا کې د افغانانو ونډې او د یادې موضوع اړوند مختلف علمي معلومات وړاندې شول او د سیمینار د ګډونوالو پوښتنې هم ځواب شوې.
د ننګرهار پوهنتون د محصلانو خدمتونو انسجام امر قاري بشیر احمد احمدي د سیمینار د ارزونې پر مهال له محقق محمد کریم ادیب څخه مننه وکړه چې په خورا ښه شکل یې د سیمینار مطالب محصلینو ته ارایه کړل او زیاته یې کړه چې د محصلانو خدمتونو انسجام امریت تل د محصلینو او ځوانانو د علمي سویې لوړولو، بیدارۍ، مسؤلیت پذیرۍ، دین او هېواد دوستۍ په موخه بېلابېل علمي سیمینارونه دایر کړي او دغه چاره به راتلونکي کې هم ادامه ولري.
سرچینه: د عامه اړیکو، اطلاعاتو او نشراتو امریت
