ننګرهار پوهنتون سره د کتابونو مرسته وشوه
د سراج الاخبار د علمي، ادبي او سیاسي خپرونې د لومړي کال مطالب، چې د هېواد د پیاوړي ژورنالېست داود جنبش له خوا راټول او په کتابي بڼه چاپ شوي، د ښاغلي جنبش د ورور او د ولسمشر د سلاکار حاجي اجمل ساپي له خوا د ننګرهار پوهنتون رئیس پوهاند دوکتور خلیل احمد بهسودوال ته وسپارل شول.
پوهاند بهسودوال د سراج الاخبار د تاریخي خپرونې د مطالبو راټولول او چاپ پر ځای ګام وباله او زیاته یې کړه، چې د نوموړي ارزښتمن اثر چاپ زمونږ د ویاړمنې ماضي له حال سره تړل دي او ځوان نسل مو د سل کاله مخکېنيو حالاتو سره اشنا کوي. نوموړي د ښاغلي ساپي مننه وکړه، چې نوموړی ارزښتمن اثر یې ننګرهار پوهنتون ته ډالۍ کړ.
همدا راز د پشه يي- پښتو قاموس، چې د ارواښاد پوهندوی نور محمد غمجن تمیل له خوا په ۱۳۵۰ لمریز کال لیکل شوی او تازه د اطلاعاتو او فرهنګ وزارت د بهیقي کتاب خپرولو ریاست له خوا چاپ شوی، د ارواښاد غمجن د کورنۍ په استازۍ د ښاغلي همت سلطاني له خوا د ننګرهار پوهنتون مشرتابه ته وسپارل شو.
د پوهنتون رئیس اړوندو مسؤلینو ته سپارښتنه وکړه، چې یاد کتابونه د پوهنتون په عمومي کتابتون کې ځای پر ځای کړي، چې استادان او محصلین ترې ګټه واخلي.
