د ننګرهار پوهنتون کرنې پوهنځي ماسترۍ برنامې دریو څانګو کې د نباتاتو پر بېلابېلو ډولونو ۹۰ څېړنیزې پروژې پیل شوې.
د مسؤلینو په وینا، یادې څېړنې ددې پوهنځي د کرنیزو تولیداتو د ځنځیري ارزښت مدیریت، اګرانومي او هارتیکلچر څانګو د ماسترۍ برنامو د ۹۰ تنو محصلینو له لوري په ننګرهار، لغمان او کونړ ولایتونو کې پر ممپلیو، شولو، جوارو، میو، رومیانو، کچالو او نورو بېلابېلو نباتاتو ترسره کېږي.
د يادو پروژو په ترسراوي کې د ننګرهار پوهنتون سربېره ددې ولايت د کانال او کرنې، اوبو لګولو او مالدارۍ ریاستونو له لابراتوارونو، څیړنیزو مرکزونو، ماشین آلاتو، ناروغیو تشخیص لابراتوارونو او نورو امکاناتو ګټه اخیستل کیږي.
د ننګرهار پوهنتون کرنې پوهنځي د اګرانومي ډیپارټمنټ آمر دوکتور عصمت الله دوراني وویل: دغه څېړنیزې پروژې د ختيځ زون کرنیزو اړتیاوو او اهدافو ته په کتنې ډیزاین شوي او هڅه کوي، د هېواد په ټولو ولایتونو کې د محصلینو عملي زده کړو په موخه څېړنیزې پروژې ترسره کړي.
نوموړی وايي، اوسمهال په اګرانومي او د کرنیزو تولیداتو د ځنځیري ارزښت مدیریت څانګو کې څېړنې پیل شوي او نږدې راتلونکي کې به په هارتیکلچر څانګه کې هم څېړنې پیل شي.
د ننګرهار پوهنتون د علمي چارو مرستیال پوهندوی مــ/ــولوي احسان الله ناصح د یادو څېړنیزو پروژو په پرانیسته خوښي وښوده، د څېړنو او علمي تحقیقاتو ترسره کول یې د ډېر اهمیت وړ وبلل او یاده چاره یې د پوهنتونونو اصلي دنده او مکلفیت ياد کړ.
د نوموړي په خبره، په کرنیز ډګر کې پرمختګ او عصریتوب د علمي تحقیقاتو پرته ناشونی دی، چې د یادې برخې د پرمختیا او پیاوړتیا لپاره باید زمونږ علمي کادرونه اړینې او ګټورې څېړنې ترسره کړي.
د علمي چارو مرستیال زیاته کړه: د یادو څېړنو له بشپړېدو وروسته به یې پایلې د اړوندو ارګانونو، متخصصینو او بزګرانو سره شریکې کړي.
سرچینه: د عامه اړیکو، اطلاعاتو او نشراتو آمریت
