د ننګرهار پوهنتون علمي شورا نوبتي غونډه وکړه.
په نوموړې کاري ناسته کې، چې د عقرب په۲ مه نېټه ترسره شوه او د پوهنتون مرستیالانو، د بېلابېلو پوهنځيو رئیسانو، استادانو او یو شمېر آمرینو په کې برخه لرله، د علمي او تدریسي چارو، علمي ترفیعاتو، تقرر کیسونو او يو شمېر نورو موضوعاتو په اړه بحث او پرېکړې وشوې.
د ننګرهار پوهنتون رئیس شیخ انعام الله مدني د مجلس د پرانیستې وینا پر مهال د ټولو پوهنځیو له مسؤلینو او ډیپارټمنټونو امرینو مننه وکړه چې د پوهنتون په علمي برخه کې هلې ځلې کوي او ښې لاسته راوړنې لري.
د ننګرهار پوهنتون د علمي چارو مرستیال پوهندوی مولوي احسان الله ناصح د شورا له غړو سره د پوهنتون په علمي برخه کې د تېرې یوې میاشتې د ترسره شویو فعالیتونو او لاسته راوړنو راپور شریک کړ، د پوهنتون استادانو ته د ظرفیت لوړونې ورکشاپونو په اړه معلومات وړاندې کړل، د نصاب تدوین اړوند یې د لوړو زده کړو وزارت سپارښتې شریکې کړې او د هغې په تعقیب یې د عاجلو اقداماتو ترسراوي باندې ټینګار وکړ.
د غونډې پر مهال د محصلانو چارو مرستیال پوهنیار حافظ سید محمد قاسم هاشمي محصلینو ته د دایر شویو برنامو اړوند او د اداري او مالي چارو مرستیال مفتي نعمت الله اعزازي د پوهنتون علمي، اداري او تدریسي برخو کې چارو ښه ترسراوي په موخه د مالي منابعو او امکاناتو چمتو کولو په هکله معلومات وړاندې کړل.
د مجلس په وروستۍ برخه کې د ننګرهار، کونړ سید جمال الدین افغاني، لغمان، بامیان، غور، سلام، سپین غر، خراسان او التقوی پوهنتونونو د علمي ترفیعاتو ۹ او تقرر ۱۵ کیسونه مطرح کولو سربېره د بېلابېلو پوهنځیو اړوند یو لړ متفرقه مسایلو باندې بحثونه وشول او په اړه یې لازمې پرېکړې وشوې.
