ننګرهار پوهنتون کې د داخلي او بهرنیو ژبو زده کړې یو کلن جوړ شوي کورس څخه ۲۶۵ تنه محصلین فارغ شول.
د لوړو زده کړو محترم وزارت په لارښوونه او مالي ملاتړ ننګرهار پوهنتون کې د ۱۴ ګونو پوهنځیو محصلینو ته د پښتو، دري، عربي او انګلیسي ژبو د زده کړې یو کلنې جوړې شوې برنامې څخه (۲۶۵) تنه فارغ شول.
په همدې مناسبت د ننګرهار پوهنتون محصلانو خدمتونو او همغږۍ امریت له لوري د پوهنتون د غونډو په تالار کې د کورس اختتامیه مراسم جوړ شوي وو، چې د ننګرهار پوهنتون رئیس شیخ انعام الله مدني، د محصلانو چارو مرستیال مولوي عبیدالله عابد، د څېړنو او علمي مجلو مرستیال پوهندوی دوکتور سعید محمد وقار، د پوهنځیو رئیسانو، استادانو او فارغو محصلینو په کې ګډون کړی و.
د ننګرهار پوهنتون رئیس شیخ انعام الله مدني غونډې ته په وینا کې د یاد کورس په بریالي ترسراوي خوښي وښوده، د روزونکو استادانو یې مننه وکړه او محصلینو لپاره یې د زیاتو ژبو زده کولو په اهمیت او ګټو خبرې وکړې.
قدرمن شیخ صاحب زیاته کړه، د دې ډول روزنیزو کورسونو او برنامو له لارې محصلین کولی شي، خپل علمي او ژبنیز ظرفیت لوړ کړي، د مسلکي پرمختګ تر څنګ ځان لپاره غوره کاري فرصتونه ومومي او راتلونکي کې یې هم محصلینو لپاره د ورته برنامو د دایرېدو سپارښتنه وکړه.
د غونډې په پای کې د پوهنتون رهبرۍ، پوهنځیو مسؤلینو او استادانو له لوري فارغو محصلینو ته د فراغت سندونه ورکړل شول.
