دژبو او ادبياتو پوهنځی

لنډه پېژندنه

د ژبو او ادبیاتو پوهنځی د ننګرهار پوهنتون په علمي او اداري تشکيل کې د پرمختيايي پلان له مخې په ۱۳۶۳ ل کال په رسمي ډول تاسيس شوی دی. هغه مهال يې يوازې يوه څانګه (پښتو ژبه او ادبيات) درلوده چې د استادانو شمېر يې(۶) تنه وو. یاد پوهنځی هم په همدې نامه ( د پښتو ژبې او ادبياتو پوهنځی) سره یادیده. ورپسې د روسي ژبې او ادب څانګه هم پکې د يو څو کالو لپاره فعاله شوه. د وخت له غوښتنو او اړتياوو سره سم پکې نورې څانګې لکه: د انګليسي ژبې او ادب څانګه په ۱۳۷۱ ل کال فعاله شوه. په ۱۳۷۲ ل کال د عربي ژبې او ادب څانګه نوې تاسيس شوه. بايد يادونه وکړو چې د پښتو ژبې او ادب څانګې په اډانه کې د شپې برنامه هم تاسيس شوه، دوه کاله يې د ژبو او ادبياتو پوهنځي په چوکاټ کې فعاليت درلود، خو په ۱۳۸۳ ل کې د ښوونې او روزنې پوهنځي اداري تشکيل ته ورانتقال شوه. له ۱۳۷۱ ل را په ديخوا د ژبو او ادبیاتو پوهنځي په درسي نصاب کې د وخت د غوښتنو سره سم ادلون بدلون راغلی. دغه راز د دري ژبې او ادب څانګه په ۱۳۸۲ ل کال کې فعاله شوه، له دې وروسته د ژبو او ادبیاتو پوهنځي په تشکیل کې د هندي ژبې او ادب څانګه په ۱۳۸۵ ل کال تاسيس شوه او همدارنګه په ۱۳۹۳ ل کال کې د دې پوهنځي په تشکیل کې د جرمنی ژبې او ادب څانګه رامنځته شوه. دا مهال د ژبو او ادبیاتو پوهنځی ټولې شپږ څانګې لري چې له دې ډلې څخه یې په دوه څانګو پښتو ژبه او ادب کې په ۱۳۹۳ ل کال د ماسترۍ پروګرام تاسيس شوی او همدارنګه په عربي ژبه او ادب څانګه کې په ۱۳۹۹ل کال کې د ماسترۍ پروګرام تاسیس شوی دی.

کله چې په یاد پوهنځي کې له پښتو ژبې او ادب څانګې څخه پرته نورې څانګې ايجاد شوې، نو د پوهنځي نوم د( پښتو ژبې او ادب پوهنځي) څخه د ژبو او ادبياتو پوهنځي په نوم بدل شو. دې پوهنځي د خپل فعاليت په بهير کې د لومړۍ ورځې څخه را پدې خوا په مختلفو څانګو کې یو زیات شمېر مسلکی کادرونه د ټولنې د خدمت لپاره روزلی دي.

اوس مهال د دې پوهنځي په شپږو څانګو کې د محصلانو مجموعي شمېر(۱۱۱۵) تنه دي. د محصلينو د علمي سويې د لوړولو په خاطر کتابتون، کمپيوټر ليب او د انټرنټ سهولت موجود دی. د تشکيل له مخې دغه شمېر محصلانو ته په علمي کادر کې شامل ( ۵۲) تنه استادان په تدريس بوخت دي. د ژبو او ادبیاتو پوهنځی په خپل علمي چوکاټ کې د چارو د ښه تر سراوي او پراختیا په موخه یو شمېر کمېټې لري چې په مسلکي کادرونو سنبال دي لکه د تضمین کېفیت، نصاب او کریکولم، څېړنې، فرهنګي چارو، نظم دسپلین او د شکایتونو اورېدلو، ازموینو، ستراتیژیک پلان او برېښنايي زده کړو کمېټه. همدارنګه د ژبو او ادبیاتو پوهنځي نوی ستراتيژيک پلان د زېربنايي خدماتو، بشري منابعو او د نوو اکاډمیکو پرمختګونو پر بنسټ ولاړ دی.

ماموريت

د داخلي او بهرنیو ژبو ( پښتو، دري، انګلیسي، عربي، هندي او الماني) په ادبیاتو کې د لېسانس او ماسټر په کچه د وړ او مسلکي کادرونو روزل څو هېوادنۍ او بهرنۍ اړتیاوې د صنعت او ټکنالوژۍ سره همغږې کړي.

ليدلوری

د ژبو او ادبیاتو پوهنځی د خپل لرلید له مخې په پام کې لري تر څو په راتلونکو ( ۵ نه تر ۷) کلونو په موده کې د لېسانس په کچه د نویو څانګو د ایجاد تر څنګ په مختلفو ژبو او ادبیاتو کې د ماسټرۍ او دوکتورا په کچه پروګرامونه پیل کړي.

تواميتونه

د ژبو او ادبیاتو پوهنځی د ننګرهار ولایت اطلاعاتو او کلتور ریاست، پوهنې ریاست او هندوستان قونسلګري، ایران قونسلګري او پکتیا پوهنتون سره تفاهم لیک لري چې د محصلینو د عملي زده کړو په برخه کې له یاد پوهنځي سره په بېلابېلو برخو کې مرسته کوي.

څانګې

۱- پښتو څانګه

۲- عربي څانګه

۳- دري څانګه

۴- انګلیسي څانګه

۵- هندي څانګه

۶- الماني څانګه

تحصيلي نصاب

د ژبو او ادبیاتوپوهنځی د ټولنې غوښتنو ته په کتو سره درسي نصاب لري، چې د لوړو زده کړو وزارت لخوا تائيد او ياد پوهنځي ته په واک کې ورکول شوی او په شپږنو څانګو کې تدريسيږي. د ژبو او ادبیاتو پوهنځي د شپږنو څانګو تحصیلي نصاب په لاندې ډول سره دی: