د ننګرهار پوهنتون چاپېریال ساتنې مرکزي کمېټې غونډه وکړه.
په یاده کاري ناسته کې، چې ددې پوهنتون د رئيس پوهاند دوکتور خليل احمد بهسودوال په مشرۍ ترسره شوه، د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال، د علمي چارو او محصلانو چارو مرستیالانو، د پوهنځیو معاونینو او د یادې کمېټې غړو برخه لرله.
د مجلس د پرانیستې وینا پر مهال د ننګرهار پوهنتون رئیس پوهاند دوکتور خليل احمد بهسودوال د پوهنتون پر پاکۍ، فزیکي ښکلا، سمسورتیا او چاپېریال ساتنې تاکید وکړ.
نوموړي د کمېټې غړو ته سپارښتنه وکړه، چې د یوه مناسب تحصیلي چاپېریال د رامنځته کېدو په خاطر د پوهنتون د بېلابېلو برخو د لارو او سرکونو رغولو، تنویر، پاکۍ او سمسورتیا ته ځانګړې پاملرنه وکړي او په دې برخه کې د اړوندو څانګو سره په ګډه کار وکړي.
د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال پوهنیار قاضي خالد صداقت چاپېریال ساتنه د هر فرد ایماني او انساني مسؤلیت یاد کړ او د پوهنتون له ټولو منسوبینو یې غوښتنه وکړه، چې په یاده برخه کې خپل مسؤلیت او رسالت په ښه توګه ادا کړي.
د پوهنتون مشرتابه د اداري مجلس د پرېکړې سره سم د حقوقو او سیاسي علومو پوهنځي استاد پوهنوال سید اکرم هاشمي د چاپېریال ساتنې مرکزي کمېټې د نوي مشر په توګه د کمېټې غړو ته معرفي کړ او هغوی یې له نوموړي سره ګډ کار او همکارۍ ته راوبلل.
پوهنوال هاشمي د پوهنتون د رهبرۍ مننه وکړه او زیاته یې کړه، چې پوهنتون خپل کور ګڼي او په هره برخه کې ددې علمي کور خدمت د ځان لپاره ویاړ او افتخار بولي.
د غونډې په وروستۍ برخه کې د کمېټې لپاره د کاري پلان او طرزالعمل جوړولو، د چاپېریال د تقویمي ورځو نمانځلو، د پوهنځیو په کچه د یادو کمېټو فعالولو، د پوهنتون د بېلابېلو برخو سمسورتیا، پاکۍ او رغولو په اړه بحث او پرېکړې وشوې.
