ننګرهار پوهنتون کې (د SPSS څخه په ګټه اخیستنه د ارقامو تحلیل ) تر سرلیکلاندې دوه ورځنی ورکشاپ ترسره شو
یاد ورکشاپ د پوهنتون د علمي څېړنو کمېټې په نوښت د مسلکي زده کړو پرمختیایي مرکز کې جوړ شوی ؤ، چې د ننګرهار پوهنتون او د ننګرهار ولایت د خصوصي پوهنتونونو او لوړو زده کړو موسسو ۲۲ تنو استادانو او د څېړنو امرینو په کې برخه لرله.
د ننګرهار پوهنتون رئيس پوهاند دوکتور خلیل احمد بهسودوال د ورکشاپ د پای په مراسمو کې د وینا پر مهال د علمي څېړنو د ترسره کولو د نویو میتودونو او لارو چارو د زده کړې په اړتیا او ارزښت خبرې وکړې او زیاته یې کړه، چې یاده چاره په اړونده برخه کې د استادانو د ظرفیت لوړونې تر څنګ په ټولنه کې د شته ستونزو او ننګونو په له منځه وړلو کې هم اغېزمن تمامېږي.
نوموړي د پوهنتون د څېړنو مرکزي کمېټې د مسؤل پوهنیار محمد ملیار رحماني او د ورکشاپ د روزونکي استاد پوهنیار سید عطاءالحق بنوري مننه وکړه، چې په هلو ځلو یې د یاد ورکشاپ دایرېدو ته زمینه برابره شوه.
د علمي چارو مرستیال پوهنمل احسان الله ناصح وویل: د پوهنتون اداره هڅه کوي، چې د ځینو منابعو نه په استفادې په ننګرهار پوهنتون کې یو مجهز څېړنیز مرکز رامنځته کړي، چې له مخې به یې د بازار او ټولنې د غوښتنو په اساس د څېړنو په برخه کې مثبت بدلون رامنځته او ګټورې پایلې به ولري.
ښاغلي ناصح د ورکشاپ په موفقانه ترسراوي خوښي وښوده او برخوالو استادانو ته یې سپارښتنه وکړه، چې ترلاسه شوي مهارتونه د خپلو اړوندو پوهنځیو او څانګو له استادانو سره شریک کړي.
د ګډونوالو استادانو په استازیتوب د وترنري علومو پوهنځي استاد پوهنوال محمد بایر درمل د پوهنتون له ادارې مننه وکړه او د ترسره شوي ورکشاپ مواد یې نوي او د استادانو لپاره مهم وبلل.
د غونډې په وروستۍ برخه کې د پوهنتون د مسؤلینو له خوا د ورکشاپ روزونکي استاد پوهنیار سید عطاءالحق بنوري ته ستاینلیک او ګډونوالو استادانو ته سندونه ورکړل شول.
