ننګرهار پوهنتون کې د ونو او بوټو د دوا پاشۍ کمپاین ترسره شو.
د ننګرهار پوهنتون د مرکزي کمپس یو شمېر ونې او بوټي، چې په دې وروستیو کې د ملي بک او میډز په حشراتو اخته او د وچېدو له ګواښ سره مخ وې، ددې پوهنتون د مشرتابه په لارښوونه او د ننګرهار وادي کرنیز شرکت په تخنیکي مرسته دواپاشي شوې.
د دواپاشۍ بهیر د پرانیستې په مراسمو کې د ننګرهار پوهنتون د محصلانو چارو مرستیال پوهنوال سید اکرم هاشمي، د اداري او مالي چارو مرستیال مسعود پیروزي، د کرنې پوهنځي مرستیال پوهنیار احمدشاه قادري، د ننګرهار وادي کرنیز شرکت د نباتاتو د ساتنې آمر انجنیر شمس الرحمن شمس، د نباتي ناروغیو او آفاتو متخصص انجنیر محمد نظر او د ننګرهار پوهنتون د ساتنې او څارنې مدیریت مسؤلینو حضور درلود.
پوهنوال هاشمي د بوټو او شنې ساحې په روغتیايي او محیطي ګټو او همدارنګه د یاد کمپاین په اړتیا خبرې وکړې. نوموړي دغه راز د ننګرهار وادي کرنیز شرکت له مشرتابه مننه وکړه، چې د دواپاشۍ بهیر په ترسراوي کې یې د پوهنتون له ادارې سره تخنیکي وسایلو مرسته وکړه.
