ننګرهار پوهنتون تدریسي روغتون سره د یو عراده امبولانس مرسته وشوه.
په ټولو اړینو تجهیزاتو سمبال یاد امبولانس د PUAMI مرستندویه ادارې له خوا مرسته شوی، چې د غبرګولي په ۱۹مه د یادې ادارې د مشر ډاکټر خان محمد حبیب له خوا د درېو تنو مؤظفو نرسانو او درېو تنو چلوونکو سره یو ځای د پوهنتون د مشرتابه په حضور کې د تدریسي روغتون رئیس پوهندوی ډاکتر همایون چهاردیوال ته وسپارل شو.
په همدې اړه جوړې شوې غونډې ته د وینا پر مهال د ننګرهار پوهنتون رئيس پوهاند دوکتور خليل احمد بهسودوال د PUAMI مرستندویه ادارې مننه وکړه، چې له دې وړاندې یې هم د تدریسي روغتون د کوچنیانو، سترګې، نسايي ولادي او لابراتوار څانګو په رغونه او د اړینو روغتیايي تجهیزاتو د برابرولو په برخه کې مرسته کړې او نن یې یو ځل بیا د یوه عراده امبولانس مرسته وکړه او شپږ تنه طبي او خدماتي پرسونل یې هم په دنده وګومارل.
پوهاند بهسودوال د تدریسي روغتون له مسؤلینو هم مننه وکړه، چې په هلو ځلو یې دغه ډول مرستې جلبېږي او د روغتون په خدماتي او رغنیزه برخه کې مثبت تغیرات رامنځته شوي دي.
د تدریسي روغتون رئیس پوهندوی ډاکتر همایون چهاردیوال په یاده مرسته د خوښۍ څرګندونه وکړه او زیاته یې کړه، چې د ناروغانو د انتقال او عاجلو پېښو پر مهال به ترې ګټه واخلي.
نوموړي له تدریسي روغتون سره د PUAMI مرستندویه ادارې د تېرو مرستو یادونه وکړه، چې تل یې د دوی ملاتړ کړی او په راتلونکې کې یې د هغې پر دوام ټینګار وکړ.
د یادونې وړ ده، چې په نوموړې غونډه کې د پوهنتون، تدریسي روغتون او د PUAMI مرستندویه ادارې د مشرتابه او مسؤلینو سربېره د ننګرهار د عامې روغتیا ریاست مرستیال ډاکتر طیب سهاک هم حضور درلود.
د ننګرهار پوهنتون ۲۴۰ بستریز تدریسي روغتون په ۱۳۴۴ لمریز کال د ننګرهار پوهنتون په چوکاټ کې رامنځته شوی، چې د طب پوهنځي محصلانو او ستاژرانو د عملي زده کړو سربېره په عمومي داخله، عمومي جراحي، یورولوژي، عقلي عصبي، انستیزي، داخله اطفال، ولادي نسايي، سترګه، غوږ، پزه او ستوني، جلدي او زهروي، راډیولوژي څانګو او د لابراتوار او واکسینو په برخو کې د ختيزو څلورو ولايتونو اوسېدونکو ته روغتيايي خدمات وړاندې کوي او د عمومي داخله، عمومي جراحي، ولادي نسایي او کوچنیانو څانګو کې د تخصص پروګرام هم لري، چې په اړوندو برخو کې متخصص کدرونه او ډاکتران روزي.
