د لوړو زده کړو د پیاوړتیا پروګرام مسؤلینو د ننګرهار پوهنتون رئيس سره وليدل.

د افغانستان د پرمختګ لپاره د لوړو زده کړو د پیاوړتیا پروګرام (AHEAD) استازي نجیب الله الکوزي او ورسره مل پلاوي د ننګرهار پوهنتون رئيس پوهاند دوکتور خلیل احمد بهسودوال سره ولیدل.

په ياده لیدنه کې د پوهنتون د علمي چارو مرستیال پوهندوی دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د بهرنیو اړیکو کمېټې مشر پوهنمل دوکتور محمد دوست صافي، د طب، ښوونې او روزنې، کرنې او اقتصاد پوهنځیو رئیسانو هم برخه لرله.

ښاغلي الکوزي د خپلو راتلونکو مرستندویو پروګرامونو په اړه د پوهنتون مشرتابه ته معلومات ورکړل او زیاته کړه، چې اداره یې په پام کې لري، د ننګرهار پوهنتون د طب، ښوونې او روزنې، کرنې او اقتصاد پوهنځیو سره د لابراتوارونو، څېړنیزو مرکزونو او د اړتیا وړ نورو برخو کې مرسته وکړي او ستونزو ته یې رسیده ګي وکړي.

نوموړي وویل: له یادو مرستو سربېره د لوړو زده کړو د پیاوړتیا پروګرام اداره په پام کې لري، چې لوړو زده کړو ته د لاسرسي په نوم د ننګرهار پوهنتون او پوهنې ریاست د استازو یوه ګډه کمېټه جوړه کړي، تر څو د ښوونځیو هغه زده کوونکي، چې د لوړو زده کړو توانايي نه لري، د لوړو زده کړو زمینه برابره کړي.

د ننګرهار پوهنتون رئيس پوهاند دوکتور خلیل احمد بهسودوال د لوړو زده کړو د پیاوړتیا پروګرام مسؤلینو مننه وکړه، چې د هېواد د تحصیلي موسساتو په مرستې او ملاتړ سره ځوانانو ته د زده کړو زمینه برابروي.

د پوهنتون رئیس راغلي پلاوي ته په اړونده برخه کې د مرستې او همکارۍ ډاډ ورکړ.