د ننګرهار پوهنتون محصلینو ته د پروپوزل لیکنې یو ورځنی ورکشاپ دایر شو.
یاد ورکشاپ د څېړنو او علمي مجلو معاونیت په نوښت د پوهنتون اړوندو پوهنځیو د بېلابېلو څانګو لسګونه تنو محصلینو ته د غونډو په عمومي تالار کې وړاندې شو، چې د روزنې چارې یې د ننګرهار پوهنتون د څېړنو آمر پوهنمل دوکتور حکیم خان حقیار له خوا ترسره شوې.
د ورکشاپ پیل د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد مسؤل او د ننګرهار پوهنتون د محصلانو چارو مرستیال شیخ شاکرالله وحدت او د څېړنو او علمي مجلو مرستیال پوهندوی دوکتور سعید محمد وقار په ویناوو وشو، چې نوموړو د جوړ شوي ورکشاپ او محصلینو مسلکي ظرفیت لوړونې برنامو په ارزښت خبرې وکړې.
د پوهنتون قدرمنو مرستیالانو د پروپوزل لیکنې موخې روښانه کړې، پروپوزل یې د څېړنې لپاره بنسټ وباله، چې محصلین کولی شي د هغې په مرسته په معیاري او منظم شکل تحقیقات ترسره کړي.
د موضوع ارایې پر مهال د ورکشاپ روزونکي استاد د پروپوزل لیکنې اړوند ټول معلومات او معیارونه په پوره تفصیل سره تشریح، محصلینو ته یې بېلابېلو برخو کې لارښوونې وکړې او د هغوی پوښتنې یې ځواب کړې.
