د ننګرهار پوهنتون تدریسي روغتون روغتیايي ټیم، استادان او محصلین د تېرې شپې زلزله ځپلیو درملنې او مرستې ته رسېدلي.
د ننګرهار پوهنتون مشرتابه په هدایت د دې پوهنتون د تدریسي روغتون یوه روغتيايي ډله چې په ترکیب کې یې متخصص ډاکتران او نرسان شامل دي، د اړینو درملو او طبي تجهیزاتو سره کونړ ولایت کې د پېښې سيمې ته رسېدلی او د ټپیانو درملنه یې پیل کړې ده.
د روغتیايي ټیم سربېره د ننګرهار پوهنتون د مختلفو پوهنځیو لسګونه تنه استادان او محصلین هم د پېښې سيمې ته د مرستې په موخه روان شوي او همدارنګه د پېښې ټپیانو لپاره تدریسي روغتون کې د وینې راټولولو کمپاین پیل شوی، چې تر دې دمه اتیا زره سي سي وینه راټوله شوې ده.
د ننګرهار پوهنتون رئیس شیخ انعام الله مدني په ننګرهار، کونړ، لغمان او نورو سيمو کې د وروستۍ زلزلې له امله د زرګونه هېوادوالو په زیانمنېدو خواشيني څرګنده کړه او ژمنه یې وکړه، چې زیانمنو شویو ته به د روغتیايي خدماتو وړاندې کولو ترڅنګ د پوهنتون مشرتابه، د پوهنځیو مسؤلین، استادان او محصلین مالي مرسته راټوله کړي.
نوموړي د هېواد له ټولو شتمنو، نړیوالو، ملي او ساحوي خیریه بنسټونو څخه غوښتنه وکړه، چې د یادې پېښې قربانیانو او زیانمنو کورنیو سره لازمه همکاري ترسره او هغوی ته بیا د عادي ژوند امکانات او سرپناه برابره کړي.
د ننګرهار پوهنتون رهبري هیئت او ټول منسوبین د الله تعالی له درباره د تېرې شپې زلزلې قربانیانو ته د مغفرت دعا او ټپیانو ته د عاجلې او کاملې روغتیا غوښته کوي.
