د ننګرهار پوهنتون محصلینو ته ۳ ورځنی دیني او معلوماتي سيمینار دایر شو.
یاد سيمینار، چې پر مهال به یې د ننګرهار پوهنتون د شرعیاتو پوهنځي استادانو، د هېواد جیدو علماء کرامو او افتخاري شیوخو له لوري د ۱۴ ګونو پوهنځیو محصلینو ته د مختلفو دیني او اصلاحي مسایلو په اړه بیانونه او پرېزنټېشنونه وړاندې شي، د ننګرهار پوهنتون د دعوت او ارشاد امریت په نوښت د پوهنتون په جامع مسجد کې تنظیم شوی دی.
د سيمینار پرانیستې په مراسمو کې د ننګرهار پوهنتون د علمي چارو، محصلانو چارو، څېړنو او علمي مجلو مرستیالانو، د بېلابېلو پوهنځیو رئیسانو، استادانو، د ننګرهار ولایت د علماوو شورا غړو، جیدو علماوو او د ننګرهار پوهنتون د بېلابېلو پوهنځیو سلګونو تنو محصلینو برخه لرله.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي په خپله وینا کې د اسلامي ارزښتونو پر بنسټ خپلو مسؤلیتونو ته د ځوانانو او محصلینو متوجه کول او هغوی د اسلامي شریعت په مُقتضی پوهول اړینه چاره وبلله، چې په وینا یې د انسان د خیر او فلاح سبب ګرځي.
ښاغلي هاشمي د محصلینو او ځوانانو په سالمې روزنې د ټینګار تر څنګ وویل، ځوانان د ټولنې بنسټ، ځواک او راتلونکی دی، چې باید د علم، اخلاقو او اسلامي ارزښتونو په ترلاسه کولو سره اسلامي نړۍ او خپل هېواد ته د ښه خدمت جوګه وګرځي.
نوموړي همدارنګه د سيمینار له تنظیموونکو مننه وکړه او محصلینو ته یې سپارښتنه وکړه، چې د خپل شخصیت جوړونې په موخه سيمینار کې فعاله ګډون وکړي.
د سيمینار په لومړۍ ورځ د ننګرهار پوهنتون د شرعیاتو پوهنځي استاد پوهاند اسرارالحی منیب د ایمان تشریح ولا او براء، د ننګرهار ولایت د علماوو شورا غړي او د ام العلوم مدرسې مدرس شیخ القران والحدیث مولوي عبدالحی حنفي د انسان پیدایښت او د نصوصو په رڼا کې د دنیا د تخلیق جریان او جید عالم شیخ القران والحدیث مولوي نادر خان صاحب محرمات په قرانکریم کې موضوعات محصلینو ته ارایه او د هغوی پوښتنې يې ځواب کړې.
د یادونې وړ ده، چې د اجنډا له مخې د سيمینار لومړۍ ورځې ته د ننګرهار پوهنتون د شرعیاتو، حقوقو او سیاسي علومو، عامه ادارې او پالیسۍ، وترنري علومو، ساینس او کمپیوټر ساینس پوهنځیو محصلین رابلل شوي وو او د سيمینار پاتې دوو ورځو کې به د نورو پوهنځیو محصلینو ته مختلف موضوعات وړاندې شي.
