ننګرهار پوهنتون کې د ۱۱ کادري بستونو لپاره له ۸۳ تنو کاندیدانو ازموینه واخیستل شوه.
یاده ازموینه د لوړو زده کړو وزارت او ننګرهار پوهنتون د ګډ هیئت له خوا د ننګرهار، لغمان، نورستان، کونړ سید جمال الدین افغاني، پروان او بامیان پوهنتونونو د کادري بستونو لپاره واخیستل شوه.
د ازموینې د اخیستلو په موخه د لوړو زده کړو وزارت څخه د تقرر او ترفیعاتو ریاست کارپوه نوید احمد احمدي، د یاد ریاست د تقرر او انفکاک آمر زمري خیشکي او د تقرر او ترفیعاتو کمېسون غړي او د ننګرهار پوهنتون د ژورنالېزم پوهنځي رئیس پوهندوی سید سمیع الله سعیدي په ګډون درې کسیز هیئت راغلی ؤ، چې د ننګرهار پوهنتون د ممتحنه هیئت سره په ګډه یې د نوموړو پوهنتونونو د مسؤلینو په حضور کې یاده ازموینه واخیستله.
د ننګرهار پوهنتون رئیس پوهاند دوکتور خلیل احمد بهسودوال د ازموینې د اخیستلو پر مهال ګډونوالو ته ډاډ ورکړ، چې د لوړو زده کړو وزارت څخه د راغلي هیئت سره په ګډه یې د ازموينې د روڼتیا او شفافیت په برخه کې تر ممکنه حده هلې ځلې کړي دي.
نوموړي د ازموینې پروسې په اړه کاندیدانو ته معلومات ورکړل او زیاته یې کړه، چې ازموینه به په تمامه معنی شفافه واخلي او د عدالت له مخې به حق حقدار ته وسپاري.
سرچینه: د اړیکو، نشراتو او عامه پوهاوي آمریت
