په ننګرهار کې د خصوصي پوهنتونونو او لوړو زده کړو مؤسسو مسؤلینو د ننګرهار پوهنتون مشرتابه سره د خپلمنځي همکاریو پیاوړتیا او زیاتوالي په موخه غونډه وکړه.
په همدې پار د ننګرهار پوهنتون په ریاست مقام کې غونډه جوړه شوې وه، چې په کې د ننګرهار پوهنتون رئیس، د علمي چارو مرستیال، د پوهنځیو مسؤلینو او د بېلابېلو خصوصي پوهنتونونو او لوړو زده کړو موسسو رئیسانو او د علمي چارو مرستیالانو برخه لرله.
د غونډې پر مهال د خپلمنځي اکاډمیکو همکاریو زیاتوالي،د څېړنو او پرمختګ لپاره د ګډو پروژو پلي کولو، نصاب ښه والي، ورځنیو چارو کې د همغږۍ پیاوړتیا، د محصلینو مسلکي روزنې او تحصیلي چاروکیفیت لوړتیا څخه ګډې څارنې په اړه بحث او نظریات شریک شول.
د ننګرهار پوهنتون رئیس شیخ انعام الله مدني د مجلس د پرانیستې وینا پر مهال د امارتي او خصوصي پوهنتونونو تر منځ د همکاریو زیاتوالی د تحصیلي بهیر په ښه والي باندې تاثیر ګذاره یاد کړ او هغوی ته یې د مرستې او لا زیاتې همکارۍ ډاډ ورکړ.
د ننګرهار پوهنتون د علمي چارو مرستیال پوهندوی مولوي احسان الله ناصح په خپلو خبرو کې (د هېواد په پوهنتونونو کې د اسلامي ثقافت تدریس، ارزښت او اغېزې) تر سرلیک لاندې د ننګرهار پوهنتون له لوري جوړېدونکي ملي کنفرانس په اړه معلومات وړاندې کړل او په یاد کنفرانس کې یې د خصوصي تحصیلي بنسټونو مشورې، ګډون او همکاري اړینه وبلله.
د خصوصي پوهنتونو مسؤلینو په خپلو خبرو کې د اسلامي امارت د حاکمېدو راهیسې په خصوصي تحصیلي بنسټونو کې د رامنځ ته شویو پرمختګونو او خپلو لاسته راوړنو په اړه خبرې وکړې او د ننګرهار پوهنتون له ملاتړ څخه یې مننه وکړه.
د یادونې وړ ده، چې التقوی خصوصي پوهنتون (د افغانستان په دوامداره اقتصادي وده کې د کورني اقتصاد رول) او سپین غر لوړو زده کړو موسسه ( افغانستان کې روغتیايي سیستم او خدمتونو ته کتنه؛ ستونزې، فرصتونه او حل لارې) تر سرلیک لاندې نړیوال او ملي کنفرانسونه دایروي، چې په همدې موخه یې د مقالو لیکلو، راټولولو او کتلو برخه کې د ننګرهار پوهنتون له ترسره کړو همکاریو مننه او د لا زیاتې همکارۍ غوښتنه وکړه.
