ننګرهار پوهنتون کې د ۱۴۰۳ کال کانکور ازموینې لپاره د چمتووالي غونډه جوړه شوه.
په نوموړې کاري ناسته کې، چې د پوهنتون د رئیس په مشرۍ ترسره شوه، د پوهنتون مرستیالانو، د ازموینو کمېټې غړو، د استادانو چارو، محصلانو چارو، اړیکو او نشراتو، خدماتو او د لیلیې مسؤلینو برخه لرله.
د مجلس پر مهال د ننګرهار پوهنتون رئیس شــيخ انعام الله مدني اړوندو مسؤلینو ته د کانکور د راتلونکې ازموینې لپاره د اړینو تدابیرو نیولو او لازم چمتووالي سپارښتنه وکړه.
د بایومتریک او ازموینې لپاره د مناسبو محلونو جوړول، د ممتحنو استادانو ټاکل، امنیت او خوندیتوب، صحي ټیمونو ګمارل، ترانسپورت، له رسنیو د کانکور اړوند خبرتیاوو او معلوماتو خپرول هغه موضوعات وو، چې په غونډه کې پرې بحث او په اړه یې لازمې پرېکړې وشوې.
د ازموینو ملي ادارې له پلان سره سم د ننګرهار ولایت د ۱۴۰۳ کال کانکور ازموینې د بایومتریک معلوماتو ثبتولو پروسه به راتلونکې سه شنبه او چهارشنبه د سرطان/ چنګاښ په (۱۲- ۱۳مه) نېټه او د کانکور ازموینه به د پنجشنبې، جمعې او شنبې په ورځو د سرطان/ چنګاښ په (۱۴– ۱۵ – ۱٦ مه) نېټه په ننګرهار پوهنتون کې واخیستل شي.
سرچینه: د عامه اړیکو، اطلاعاتو او نشراتو آمریت
