ننګرهار پوهنتون کې د ۱۴۰۱ لمریز کال د کانکور ازموینې بهیر پیل شو.
یاده ازموینه، چې درې ورځې به دوام وکړي، د ننګرهار ولایت د دولسمو ټولګیو د څه دپاسه ۹ زرو تنو فارغانو څخه به په کې ازموینه واخیستل شي.
په همدې مناسبت د تلې په ۱۴ مه نېټه د ننګرهار پوهنتون د غونډو په تالار کې پرانیستغونډه جوړه شوې وه، چې د ننګرهار پوهنتون د مشرتابه او استادانو سربېره په کې د ازموینو ملي ادارې څخه د راغلي پلاوي غړو او مسؤلینو برخه لرله.
غونډه د ننګرهار پوهنتون رئیس پوهاند دوکتور خلیل احمد بهسودوال په پرانيستونکې وينا پيل شوه؛ نوموړي وويل: د کانکور نننۍ ازموينه، چې درې ورځې به دوام وکړي، د ننګرهار ولایت د دولسمو ټولګیو د ۹۲۰۳ تنو فارغانو څخه په کې ازموینه واخیستل شي.
نوموړي وويل: د کانکور ازموينه په ۳ حوزو کې د ازموينو ملي ادارې او ننګرهار پوهنتون د ۱۰۰ تنو استاذانو له خوا اخيستل کېږي.
پوهاند بهسودوال زیاته کړه، چې د پوهنتون ادارې د ازموینو ملي ادارې د راغلي پلاوي سره په ګډه د ازموینې د روڼتیا لپاره ټول اړین تدابیر نیولي او ممتحنو استادانو ته یې په شفافه توګه د ازموینې اخیستلو سپارښتنه کړې ده.
د ازموينو ملي ادارې څخه د راغلي پلاوي مشر او د یادې ادارې د پوښتنپاڼو بانک رئیس پوهنمل دوکتور سید روضت الله مجید د کانکور ازموینې په اړه د لنډو معلوماتو ورکولو سربېره د غونډې ګډونوالو ته ډاډ ورکړ، چې د ننګرهار پوهنتون له استاذانو سره په ګډه به د ازموينې په شفافې اخيستنه کې هلې ځلې وکړي.
د غونډې په پاى کې د ټولو ګډونوالو په حضور کې د پوښتنپاڼو د بکسونو قلفونه خلاص او رسماً ازموينه پيل شوه.
د ننګرهار پوهنتون رئیس پوهاند دوکتور خلیل احمد بهسودوال د لوړو زده کړو وزارت فوق العاده استازي او د اداري او مالي چارو مرستیال پوهنیار قاضي خالد صداقت، د علمي چارو مرستیال پوهندوی احسان الله ناصح او د محصلانو چارو مرستیال سید محمد قاسم هاشمي په ملتیا د ازموینې بهیر څخه لیدنه وکړه.
د يادونې وړ ده، چې د کانکور ازموينې بهير به راتلونکې دوه ورځې ( جمعه او شنبه) چې د تلې د (۱۵-۱۶) نېټې سره برابره ده، نور هم دوام وکړي.
