ننګرهار پوهنتون کې د کرکټ سيالۍ د ساینس پوهنځي په بریا پای ته ورسېدې
د کرکټ سياليو یاد ټورنمنټ، چې یوه میاشت یې دوام وکړ، د پوهنتون د سپورت او بدني روزنې آمريت له خوا ددې پوهنتون د ديارلسګونو پوهنځيو د لوبډلو ترمنځ جوړ شوی ؤ.
د ټورنمنټ پایلوبې ته د ساینس او ژبو او ادبیاتو پوهنځيو لوبډلو لار پیدا کړه، چې توپ وهنه د ژبو او ادبیاتو پوهنځي لوبډلې پیل کړه او خپلې سیالې ډلې ته یې د ۷۹ منډو هدف وټاکه، چې د ساینس لوبډلې نوموړی هدف د درې لوبغاړو په سوځېدو ترلاسه کړ او د سیالیو اتلولي یې خپله کړه.
د ټورنمنټ د پای په مراسمو کې د ننګرهار پوهنتون د محصلانو چارو مرستيال پوهندوی سید اکرم هاشمي په پوهنتونونو کې د سپورتي فعالیتونو په اړتیا او ارزښت خبرې وکړې.
نوموړي وویل: سپورتي فعالیتونه د محصلانو په فزيکي او ذهني وده مثبت اغېز ښندي او د پوهنتون اداره د سالم علمي او تدریسي چاپېریال د برابرولو تر څنګ د سپورت ودې او پرمختګ ته هم ژمنه ده.
د ننګرهار پوهنتون د سپورت او بدني روزنې آمر محمد نسیم کاکړ وویل، چې له دې سیالیو یې موخه د پوهنتون د کرکټ منتخب ټیم ټاکل ؤ، چې له دې وروسته به له پوهنتون څخه بيرون د پوهنتون د استازي ټیم په توګه له نورو لوبډلو سره سیالۍ کوي.
د مراسمو په پای کې ګټونکو لوبډلو او د سیالیو غوره لوبغاړو او تنظیموونکو ته کپونه، مډالونه او ستاینلیکونه ورکړل شول.
د یادونې وړ ده، چې د سیالۍ د پای په مراسمو کې د ساینس پوهنځي رئیس پوهندوی صفت الله شاکر او د ژبو او ادبیاتو پوهنځي مرستیال پوهنیار غفران الله معروف او د یادو پوهنځیو د استادانو او محصلانو سربېره د پوهنتون د بېلابېلو پوهنځیو سلګونو تنو محصلینو هم برخه لرله.
