ننګرهار پوهنتون کې د کرکټ سيالۍ د ساینس پوهنځي لوبډلې په بریا پای ته ورسېدې.
د کرکټ سياليو یاد ټورنمنټ یوه اوونۍ وړاندې د پوهنتونونو د تدریسي بهیر د پیلېدو په ویاړ د ننګرهار پوهنتون د سپورت او بدني روزنې آمريت له خوا ددې پوهنتون د اړوندو پوهنځيو د لوبډلو ترمنځ پیل شوی ؤ.
د ټورنمنټ پایلوبې ته د ساینس او طب پوهنځیو لوبډلو لار پیدا کړه، چې توپ وهنه د طب پوهنځي لوبډلې پیل کړه او خپلې سیالې ډلې ته یې د ۸۵ منډو هدف وټاکه، چې د ساینس لوبډلې نوموړی هدف د څلورو لوبغاړو په سوځېدو په ۷ اورونو کې ترلاسه کړ او د سیالیو اتلولي یې خپله کړه.
د ټورنمنټ د پای په مراسمو کې د ننګرهار پوهنتون د محصلانو چارو مرستيال پوهنوال سید اکرم هاشمي، د ساینس پوهنځي رئیس پوهنیار رفیع الله رفیع، د سپورت او بدني روزنې آمر محمد نسیم کاکړ او د پوهنتون د یو شمېر استادانو له خوا ګټونکې لوبډلې او غوره لوبغاړو ته ډالۍ او کپونه ورکړل شول.
