ننګرهار پوهنتون کې د چاپېریال ساتنې نړيواله ورځ د يوې سترې غونډې په ترڅ کې ونمانځل شوه.

nu_admin
دوشنبه ۱۴۰۰/۳/۱۷ - ۸:۴۷
image

 

ياده نمانځغونډه، چې د دې پوهنتون د چاپېریال ساتنې او فرهنګي کمېټو او د ننګرهار د چاپېریال ساتنې ریاست په نوښت جوړه شوې وه، د ننګرهار پوهنتون د مشرتابه، مرستيالانو، د بېلابېلو پوهنځيو د رئيسانو، استادانو او اداري کارکوونکو سربېره پکې د ننګرهار ولایت مقام مرستیال او د ولایتي ادارې ځینو رئیسانو او مسؤلينو هم برخه لرله.

د غونډې د پرانيستې وينا پر مهال د ننګرهار پوهنتون رئيس پوهاند دوکتور خليل احمد بهسودوال د غونډې برخوالو ته د ښه راغلاست تر څنګ د چاپېریال ساتنې نړيوالې ورځې د نمانځې د موخو او ارزښت په اړه خبرې وکړې.

نوموړي وويل: د چاپېریال ساتنې نړیواله ورځ د ۱۹۷۴ زېږدیز کال را په دې خوا په ټوله نړۍ کې نمانځل کېږي، چې عمده موخه یې وګړو ته د چاپېریال د ساتنې، پاکۍ او د هغې څخه د سالمې ګټې اخیستلو په اړه د عامه پوهاوي ورکول دي.

د پوهنتون رئیس زیاته کړه: د هوا، اوبو او خاورې ککړتیا، په غیر فني او مسلکي توګه د ځنګلونو وهل، د اوبو له زېرمو ناسالمه ګټه اخیستنه، د مرغانو او ژویو ښکار او نور هغه څه دي، چې دم ګړۍ یې د بشریت ژوند له ګواښ سره مخ کړی، چې په وینا یې، که مخه یې ونه نیول شي، لوی ناورینونه به رامنځته کړي.

د ننګرهار ولایت مرستیال پوهنوال ببرک مياخېل د چاپېريال پر وړاندې د پیل شوې جګړې او ننګونو په اړه د غونډې برخوالو ته معلومات ورکړل او د پوهنتون په استادانو، علماء کرامو او د ټولنې په نورو هغو قشرونو یې، چې په دې برخه کې عامه پوهاوی کولی شي، غږ وکړ چې خلک وپوهوي او د چاپېريال پر وړاندې شته ننګونې را کمې او لمنځه يوسي.

د ننګرهار پوهنتون د چاپېریال ساتنې کمېټې مشر پوهندوی امین الله یوسفزی، د ننګرهار د چاپېریال ساتنې رئیس فیروز محمدزئي، د اطلاعاتو او فرهنګ رئیس رحیم الله خوږیاڼی، د ترانسپورت رئیس محمد عارف عارف، د کرنې پوهنځي رئیس پوهندوی دوکتور رشاد احمد شېرزاد او د اوومې ناحیې آمر بریالی چلند د غونډې نور ویناوال وو، چې د ښاري چاپېریالیز مدیریت او پلان جوړونه، په چاپېریال ساتنه کې د رسنیو ونډه، ایکو سیستم او د چاپېریال پر وړاندې د پرتو خنډونو او د هغې د حل لارو په اړه یې ويناوې او پريزنټيشنونه وړاندې کړل.

د غونډې په پاى کې د ننګرهار پوهنتون او ولایت مقام مشرتابه او د غونډې برخوالو په ګډه د چاپېریال ساتنې د نړیوالې ورځې په ویاړ د پوهنتون په انګړ کې د چاپېریال د پاکۍ کمپاین هم ترسره کړ.

تازه خبرونه

دوشنبه ۱۴۰۰/۶/۱۵ - ۱۰:۴۰
Background image

د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ غونډه وکړه.

 

په نوموړي کاري ناسته کې، چې د افغانستان د اسلامي امارت د لوړو زده کړو عالي کمېسون د ننګرهار ولایت مسؤل قاضي خالد صداقت، د ننګرهار پوهنتون د علمي چارو مرستيال پوهندوى دوکتور محمد حامد. . .

چهارشنبه ۱۴۰۰/۶/۱۰ - ۷:۴۷
Background image

د ننګرهار پوهنتون اداري او تقرر او انفکاک مجلسونه ددې پوهنتون د رئيس پوهاند دوکتور خليل احمد بهسودوال په مشرۍ ترسره شول.

 

په یادو کاري ناستو کې، چې د پوهنتون د محصلانو چارو مرستیال پوهنوال سید اکرم هاشمي او د اړوندو پوهنځيو او تدریسي روغتون رئيسانو او مرستیالانو په کې برخه لرله، د پوهنتون د حضوري درسونو. . .

سه‌شنبه ۱۴۰۰/۶/۲ - ۹:۳۵
Background image

د ختیز زون د لوړو زده کړو بنسټونو مسؤلینو سره د اسلامي امارت د لوړو زده کړو عالي کمېسون مشرتابه پلاوي مشورتي غونډه وکړه.

 

د افغانستان د اسلامي امارت د لوړو زده کړو عالي کمېسون مشر مولوي عبدالباقي حقاني د یوه پلاوي په مشرۍ په ختیزو ولایتونو کې د دولتي او خصوصي پوهنتونونو او د لوړو زده کړو او نیمه لوړو. . .

BACK TO NEWS