ننګرهار پوهنتون کې د نومیالي غازي میرزمان خان څلی جوړېږي
د مسؤلینو په وینا، د څلي له جوړېدو یې موخه د خپل تېر تاریخ او ویاړمنې ماضي سره د ځوان نسل اشنا کول دي.
د څلي د بنسټ ډبرې ایښودو مراسمو کې د ننګرهار پوهنتون رئیس پوهاند دوکتور خلیل احمد بهسودوال، د محصلانو چارو مرستیال پوهندوی سید اکرم هاشمي، د زماني فاونډېشن مشر استاد محب الله اسرار او د پوهنتون یو شمېر استادانو برخه لرله.
د ننګرهار پوهنتون رئیس پوهاند دوکتور خلیل احمد بهسودوال د څلي د چارو پیل پر مهال وویل: نومیالی او اتل غازي (لوی خان) غازي میرزمان خان د انګریزي ښکېلاک څخه د ګران هېواد د خپلواکۍ او ازادۍ د بېرته ګټلو د لارې هغه سرخېل غازي دي، چې په پوره مېړانه یې د هېواد د بشپړې خپلواکۍ ګټلو په برخه سترې کارنامې او سرښندنې کړي او په یاده برخه کې یې برخلیک ساز رول لرلی.
نوموړي وویل: په ننګرهار پوهنتون کې د اتل غازي میرزمان خان په اړه د جوړ شوي علمي سیمینار د پرېکړه لیک سره سم د ننګرهار پوهنتون د بهرنیو اړیکو کمېټې په هلو ځلو او د زماني فاونډېشن په مالي مرسته یاد څلی جوړېږي، چې موخه یې د غازي د کارنامو یاد او د خپل تېر تاریخ او ویاړمنې ماضي سره د ځوان نسل اشنا کول دي.
د زماني فاونډېشن مشر استاد محب الله اسرار وویل: یاد څلی د زماني فاونډېشن د مشر او بنسټګر مصطفی زماني د نږدې یو ميلیون افغانیو په مالي مرسته د ننګرهار پوهنتون په دروازه کې جوړېږي، چې د څلي تر څنګ به د دروازې د شاوخوا پلې لارې، چمن، ویالې او نورې برخې هم جوړې شي او چارې به یې په راتلونکې یوه میاشت کې بشپړې شي.
