ننګرهار پوهنتون کې د فوټبال سیالۍ پیل شوې.
د فوټبال سياليو یاد ټورنمنټ، چې دوه اوونۍ به دوام وکړي، د غبرګولي په ۴مه نېټه د ننګرهار پوهنتون د سپورت او بدني روزنې آمريت له خوا ددې پوهنتون د اړوندو پوهنځيو د ۸ لوبډلو ترمنځ پیل شو.
د ټورنمنټ د پرانیستې پر مهال د ننګرهار پوهنتون د علمي چارو مرستیال پوهنمل احسان الله ناصح او د محصلانو چارو مرستيال پوهنوال سید اکرم هاشمي د سپورت په ارزښت او ګټو خبرې وکړې او سپورتي فعالیتونه یې د محصلینو په فزيکي او ذهني وده کې اغېزمن وبلل.
نوموړو ددغه ډول سياليو پر دوام د ټينګار او ملاتړ څرګندولو تر څنګ محصلین د سپورتي اصولو او اخلاقو رعایتولو ته راوبلل.
د پوهنتون د سپورت او بدني روزنې آمر محمد نسیم کاکړ د پیل شویو سیالیو په اړه وویل، چې له دې سیالیو یې موخه محصلینو او ځوانانو ته د سالمې بوختیا رامنځته کول او دغه راز د پوهنتون د فوټبال د منتخبې لوبډلې ټاکل دي.
نوموړي زیاته کړه: په یاد ټورنمنټ کې د پوهنتون د اړوندو پوهنځیو ۸ لوبډلې برخه لري، چې نن ورځ د طب او ادبیاتو پوهنځیو په سیالۍ سره پیل شو.
