ننګرهار پوهنتون کې د فوټبال سیالۍ د ژورنالېزم او ارتباطاتو پوهنځي په بریا پای ته ورسېدې.
د فوټبال سياليو یاد ټورنمنټ دوه اوونۍ وړاندې د ننګرهار پوهنتون د سپورت او بدني روزنې آمريت له خوا ددې پوهنتون د اړوندو پوهنځيو د ۱۱ لوبډلو ترمنځ پیل شوی ؤ.
د پوهنتون د سپورت او بدني روزنې آمر محمد نسیم کاکړ وویل: له یادو سیالیو یې موخه محصلینو او ځوانانو ته د سالمې بوختیا رامنځته کول و.
د ښاغلي کاکړ په وینا، د سیالیو پایلوبې ته د انجنيري او ژورنالېزم پوهنځیو لوبډلو لار پیدا کړه، چې د ژورنالېزم او ارتباطاتو پوهنځي لوبډلې وکولای شو، چې ۵ د ۴ پر وړاندې ګولونو وهلو سره د یادو سیالیو اتلولي په خپل نوم کړي او په دې توګه د ژورنالېزم پوهنځي لوبډلې لومړی او د انجنيرۍ پوهنځي لوبډلې دویم مقام خپل کړ.
د ټورنمنټ د پای په مراسمو کې د ننګرهار پوهنتون د ژورنالېزم پوهنځي رئیس پوهندوی سید سمیع الله سعیدي او د ياد پوهنځي يو شمېر استادانو، د ننګرهار پوهنتون د محصلانو خدمتونو انسجام آمر قاري بشير احمد احمدي، د پوهنتون يو شمېر مامورينو او فوټبال لوبې ګڼو مينوالو برخه لرله، چې د سیالیو ګټونکې لوبډلې او غوره لوبغاړو ته د مسؤلينو له خوا ستاینلیکونه، کپونه، او مډالونه ورکړل شول.
سرچينه: د عامه اړيکو، اطلاعاتو او نشراتو امريت
