ننګرهار پوهنتون کې د رسول الله (صلی الله علیه وسلم) مبارک میلاد د علمي سيمینار په ترڅ کې ونمانځل شو
یاد علمي سیمینار د شرعیاتو پوهنځي فرهنګي کمېټې په نوښت جوړ شوی ؤ، چې د پوهنتون د مشرتابه سربېره په کې د بېلابېلو پوهنځیو استادانو او محصلانو برخه لرله.
د سیمینار د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال د رسول الله (صلی الله علیه وسلم) مبارک ژوند او شخصیت د مسلمانانو او ټول انسانیت لپاره رحمت او غوره الګو او مثال یاد کړ، چې په وینا یې، که په لارښوونو یې عمل وشي، بشریت به د شته ټولو ناخوالو خلاص او د سعادت او نېکمرغۍ لوړو پوړیو ته ورسي.
پوهاند بهسودوال د شرعیاتو پوهنځي او د یاد پوهنځي د فرهنګي کمېټې له رهبرۍ مننه وکړه، چې نوموړي سیمینار ته یې زمینه برابره کړه او له هغوی یې غوښتنه وکړه، چې د ورته نورو علمي پروګرامونو په جوړولو سره د بشریت د ستر ناجي (صلی الله علیه وسلم) د ژوند بېلابېلې خواوې له محصلینو او ځوانانو سره شریکې کړي.
د سیمینار په دویمه برخه کې د شرعیاتو پوهنځي رئیس پوهاند دوکتور اسرارالحی منیب او د یاد پوهنځي نورو استادانو پوهاند دوکتور دل آقا وقار، پوهنوال نصیر احمد محب، پوهندوی دوکتور نقیب جان او پوهنیار احسان الله ناصح د رسول الله (صلی الله علیه وسلم) د ژوند او شخصیت په اړه ترتیب کړي پریزنټیشنونه او ویناوې وړاندې کړې او د ګډونوالو پوښتنې یې ځواب کړې.
