ننګرهار پوهنتون کې د خزاني سمستر نهايي ازموینې پیل شوې.
د پوهنتون د مسؤلینو په وینا، په یاده ازموینه کې چې د جدي میاشتې په ۸مه نېټه پیل او درې اوونۍ به دوام وکړي، د دې پوهنتون د لیسانس، فوق لیسانس او شپې پوهنځیو محصلین په کې برخه لري.
د ننګرهار پوهنتون رئیس شیخ انعام الله مدني د علمي چارو مرستیال پوهنمل دوکتور قدرت الله عمرخېل، د څېړنو او علمي مجلو مرستیال پوهندوی دوکتور سعید محمد وقار او د ازموینو مرکزي کمېټې مشر پوهاند کریم الله بیدار په ملتیا د بېلابېلو پوهنځيو د ازموینو له صحنو څخه ليدنه وکړه.
د لیدنې پر مهال د پوهنتون مشرتابه د پوهنځیو رئیسانو، استادانو او د ازموینو کمېټې مسؤلینو ته لارښوونه وکړه، چې ازموینې دې د لوړو زده کړو وزارت د اصولو او مقرراتو سره سمې په پوره روڼتیا او شفافیت واخلي او پایلې دې یې په خپل وخت له محصلینو سره شریکې کړي.
د ننګرهار پوهنتون قدرمن رئیس وویل، چې د ازموینو د څار او نظارت مسؤلیت د پوهنځیو د مسؤلینو او کمېټو تر څنګ د ازموینو مرکزي کمېټه هم په غاړه لري، چې د ازموینو پورې اړوندې چارې تنظيموي او د څارنې راپور به د هرې کاري ورځې په پای کې د پوهنتون له رهبرۍ سره شریکوي.
