ننګرهار پوهنتون طب پوهنځي ۹۱ تنه مسلکي کادرونه فارغ او ټولنې ته د خدمت په موخه وړاندې کړل.
د پوهنتون د مسؤلينو په وينا، ياد فارغان يې په ۵۷ مه تحصیلي دوره کې د معالجوي طب په برخه کې روزلي دي.
په همدې مناسبت د جلال آباد ښار ستاره شرق هوټل تالار کې ستره غونډه جوړه شوې وه، چې د طب پوهنځي د مسؤلینو، استادانو او فارغانو سربېره په کې د ننګرهار پوهنتون مشرتابه غړو، د اطلاعاتو کلتور وزارت د ځوانانو معین، د ولایت مقام مرستیال، د ولایتي ادارې رئیسانو، علماوو، د رسنیو استازو او د فارغانو د کورنیو غړو برخه لرله.
فراغت غونډې ته د وينا پر مهال د ننګرهار پوهنتون د علمي چارو مرستیال پوهندوی احسان الله ناصح وويل: د خوښۍ ځاى دى، چې نن ورځ د ننګرهار پوهنتون طب پوهنځي په ۵۷ مه تحصیلي دوره کې ۹۱ تنه د معالجوي طب ډاکتران فارغ او ټولنې ته د خدمت په موخه وړاندې کړل.
نوموړي فارغانو او د هغوى کورنيو ته مبارکي وويله او له فارغو ډاکتر صاحبانو یې غوښتنه وکړه، چې د خپلو صلاحيتونو او وړتياوو نه په ګټې اخيستنه دې د هېواد د روغتیايي ډګر د پرمختګ لپاره کار وکړي او جګړه ځپلې ټولنې ته په خدمت کولو سره دې خپل رسالت د خداى (ج) او ولس په وړاندې په ښه توګه ادا کړي.
ښاغلي ناصح په ياد شمېر کې د ځوانو علمي او مسلکي کادرونو فراغت لويه لاسته راوړنه وبلله او د اسلامي امـ/ارت له مسؤلو ارګانونو او خصوصي سکتور یې غوښتنه وکړه، چې ورته د کار او خدمت زمينه برابره کړي.
د پوهنتون علمي مرستیال فارغو ډاکترانو ته سپارښتنه وکړه، چې په راتلونکې هم د خپل پوهنتون سره په اړيکه کې واوسي او په ابادۍ او ښېرازۍ کې يې برخه واخلي.
د طب پوهنځي رئیس پوهنوال ډاکتر محمد عظیم عظیمي په خپلو خبرو کې فارغانو او د هغوی کورنیو ته مبارکي وویله او زیاته یې کړه، چې خپل فراغت وروستی ونه ګڼي او د لا نورو مسلکي او تخصصي زده کړو لپاره هڅه او هاند وکړي.
نوموړي د غونډې برخوالو ته د لوړو زده کړو وزارت د علمي معین دوکتور لطف الله خیرخواه پیغام هم ولوسته، چې په کې د هېواد په کچه په تحصیلي بنسټونو کې د پام وړ پرمختګونو رامنځ ته کېدو او نويو سیستمونو د پلي کېدو خبره شوې وه.
د ننګرهار مرستیال والي مـ/ولوي سعید احمد بنوري، د ننګرهار د علماوو شورا رئیس شـ/يخ حضرت جان حنفي، د طب پوهنځي استاد پوهاند ډاکتر حبیب الله مـ/ولوي زاده او د امنیې قومـ/ـاندانۍ مرستیال مـ/ولوي محمد طاهر مبارز د غونډې نور ویناوال وو، چې د خپلو ویناوو پر مهال یې د یادو مسلکي کادرونو په فراغت خوښي څرګنده کړه او فارغ ډاکتران یې خپلو راتلونکو مسؤلیتونو ته ځیر کړل.
د فارغانو په استازیتوب ډاکتر عبدالرازق زیار خبرې وکړې او د ننګرهار پوهنتون او طب پوهنځي له مشرتابه او استادانو یې مننه وکړه، چې د دوی په روزنه کې یې نه ستړې کېدونکې هلې ځلې کړي.
د غونډې په وروستۍ برخه کې د مسؤلینو او استادانو له خوا پر فارغانو د فراغت تصدیقونه وویشل شول.
د یادونې وړ ده، چې ننګرهار پوهنتون طب پوهنځی په ۱۳۴۲ لمریز کال کې تاسیس شوی، چې د تاسیس له مهاله تر دې دمه یې په ۵۷ تحصیلي دورو کې ۴۶۹۶ تنه معالج ډاکتران روزلي او ټولنې ته یې د خدمت په موخه وړاندې کړي دي.
