د ننګرهار پوهنتون ژبو او ادبیاتو پوهنځي د محصلینو تر منځ د غوره ویناوالۍ سیالي ترسره شوه.
یاده سیالي، د دې پوهنځي د انګلیسي څانګې په نوښت د پوهنتون مسلکي زده کړو پرمختیايي مرکز (پي ډي سي) کې جوړه شوې وه، چې په ترڅ کې یې د انګلیسي څانګې د درېیمو او څلورمو ټولګیو محصلینو پر بېلابېلو موضوعاتو چمتو کړې ویناوې او بحثونه ارایه کړل.
په همدې اړه جوړو شویو مراسمو کې د ژبو او ادبیاتو پوهنځي د رئیس، استادانو او یو شمېر محصلینو سربېره د ننګرهار پوهنتون رئیس هم برخه لرله.
د ننګرهار پوهنتون رئیس شیخ انعام الله مدني د غونډې په پرانیستې وینا کې د جوړې شوې سیالۍ په اهمیت خبرې وکړې او ویې ویل، دا ډول علمي پروګرامونه محصلینو ته فکري وده، د استدلال وړتیا او پر ځان باور ورکوي.
نوموړي زیاته کړه، ښه ویناوالي کولی شي، د یوې ژبې د زده کړې بهیر اسانه کړي او هم محصلین او د ژبو زده کوونکي په مسلکي او علمي ډګرونو کې سیالیو ته چمتو کوي.
د ننګرهار پوهنتون د ژبو او ادبیاتو پوهنځي رئیس پوهنیار حافظ سید محمد قاسم هاشمي او د انګلیسي څانګې آمر پوهنوال میرویس شینواري په خپلو خبرو کې د جوړې شوې سیالۍ په موخو خبرې وکړې او زیاته یې کړه، چې هڅه کوي محصلینو ته د معیاري مسلکي روزنې په موخه د تدریس تر څنګ دا ډول رقابتي او علمي برنامې جوړې او د هغوی وړتیاوې لوړې کړي.
په پای کې د پوهنتون او پوهنځي مشرتابه له خوا د سیالۍ درې تنو غوره ویناوالو محصلینو ته ډالۍ ورکړل شوې.
