د ننګرهار پوهنتون علمي شورا غونډه وکړه
د ننګرهار پوهنتون علمي شورا ددې پوهنتون د رئيس پوهاند دوکتور خليل احمد بهسودوال په مشرۍ نوبتي غونډه وکړه.
په نوموړي کاري ناسته کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهندوى سيد اکرم هاشمي، د اداري او مالي چارو مرستيال حميدالله احمدزي د بېلابېلو پوهنځيو رئيسانو او استادانو په کې برخه لرله، د پوهنتون د علمي، اداري، تقرر، ترفیعاتو، رتبې تثبیت، د محصلینو پر عرایضو او يو شمېر نورو مسايلو بحث او خبرې اترې وشوې.
د ننګرهار پوهنتون رئيس پوهاند دوکتور خليل احمد بهسودوال د مجلس د پرانیستې پر مهال د شورا غړو ته د پوهنتون د وروستۍ بریا او بشپړ اکاډمیک اعتبار اخیستلو د مبارکۍ تر څنګ له ټولو استادانو او منسوبینو مننه وکړه، چې په نوموړې پروسه کې یې په اخلاص هلې ځلې وکړې او د راتلونکې لپاره یې ددې اعتبار د ساتلو او لا پرمختګ سپارښتنه وکړه.
د شورا اجنډا د علمي چارو د مرستیال پوهندوی دوکتور محمد حامد کډوال د مجلس له غړو سره شريکه کړه، چې د ننګرهار پوهنتون او یو شمېر نورو پوهنتونونو د علمي ترفیعاتو ۹، د رتبې تثبیت ۴ او د تقرر ۱۲ کیسونه، د ژبو او ادبیاتو پوهنځي په عربي څانګه کې د ماسترۍ پروګرام ایجاد، د محصلینو په عرض پاڼو او يو شمېر نورو متفرقه مسايلو بحث وشو او په اړه یې پرېکړې وشوې.
د غونډې په دویمه برخه کې د بېلابېلو پوهنځیو اته تنه استادان (د طب پوهنځي استاد پوهاند ډاکتر سیف الله هادي، د ښوونې او روزنې پوهنځي استاد پوهاند احسان الله ثاقب، د انجنیري پوهنځي استاد پوهاند زلمی خالقي، د حقوقو او سیاسي علومو پوهنځي استاد پوهنوال شمس الاسلام شمس صافی، د ژبو او ادبیاتو پوهنځي استاد او د پوهنتون د علمي مجلې عمومي مدیر پوهنیار شفیع الله حبیب، د یاد پوهنځي استاد او مرستیال پوهنیار غفران الله معروف، د وترنري علومو پوهنځي استاد پوهنیار سید عطاءالحق بنوري او د کمپیوټر ساینس پوهنځي استاد پوهنیار محبت خان محسن) چې د تضمین کیفیت پروسه کې یې وړتیا ښودلې وه، د پوهنتون د مشرتابه له خوا د علمي شورا په حضور کې د ستاینلیکونو او ایوارډونو په ورکړې سره تقدیر شول.
