د ننګرهار پوهنتون طب، حقوقو او سیاسي علومو، وترنري علومو، کرنې، عامه ادارې او پالیسۍ پوهنځیو خپلو نويو محصلينو ته د ښه راغلاست او د پوهنتون چاپېريال سره د پېژندګلوۍ غونډې جوړې کړې.
نوموړي مراسم د بېلابېلو غونډو په ترڅ کې ترسره شول، چې د یادو شویو پوهنځیو د رئیسانو او استادانو سربېره په کې د ننګرهار پوهنتون د محصلانو چارو مرستيال پوهنوال سيد اکرم هاشمي هم برخه لرله.
د ننګرهار پوهنتون د محصلانو چارو مرستیال پوهنوال سید اکرم هاشمي نويو راغلو محصلينو ته د ښه راغلاست او مبارکۍ ويلو تر څنګ هغوى خپلو مسؤليتونو ته ځير کړل. نوموړي ننګرهار پوهنتون د ټولو افغانانو ګډ علمي کور ياد کړ او محصلینو ته يې ډاډ ورکړ، چې دلته ټولې کړنې د قوانينو او مقرراتو په رڼا کې له کوم تبعيض پرته سرته رسېږي.
ښاغلي هاشمي له محصلينو غوښتنه وکړه، چې د نورو بې ځايه بوختياوو پر ځاى خپل وخت په تدريس، مطالعې او څېړنو تېر کړي.
د غونډو په وروستیو کې د یادو شویو پوهنځیو مسؤلینو او استادانو نویو راغلو محصلینو ته د اړوندو پوهنځیو د تشکيلاتي جوړښتونو، څانګو، استادانو، نصاب، کريډيټ لايحې، د ليليې مقررې، نظم او دسپلين، کتابتون، لابراتوارونو او نورو اسانتياوو په اړه معلومات ورکړل.
